देवदह । देवदहमा बिहिवार सम्पन्न रक्तदान कार्यक्रममा ४७ पिन्ट रगत संकलन भएको छ । वडा नं ९ को आयोजना र रक्त सञ्चार सेवा केन्द्र बुटवलको प्राविधिक सहयोगमा भएको कार्यक्रममा ४७ पिन्ट रगत संकलन भएको वडा अध्यक्ष मोहनबहादुर जिसीले जानकारी दिए ।

‘तेस्रो बृहत् रक्तदान कार्यक्रम’ नाम दिईएको उक्त कार्यक्रममा ७ जना नयाँ रक्तदाताले रक्तदान गरेको वडा अध्यक्ष जिसीले बताए । ‘हामीले यसअघि पनि २ पटक वडा कार्यालयमै रक्तदान कार्यक्रम सम्पन्न गरेका थियौं । जसमा पहिलो पटक ५२ पिन्ट र दोस्रो पटकको कार्यक्रममा ६५ पिन्ट रगत संकलन भएको थियो ।’ उनले भने, ‘देवदह रक्तदाताहरुको हिसावले धनी नगर हो, यहाँका हरेक नागरिकलाई रक्तदान गर्नुपर्छ भन्ने चेतना छ । त्यसैले हामीले पनि कार्यक्रम आयोजना गरेर सहकार्य गरिरहेका छौं ।’

रक्तदान कार्यक्रमको उद्घाटन गर्दै देवदह नगरपालिकाका प्रमुख ध्रुवप्रसाद खरेलले रगत अभावमा देवदहवासीले रक्तदान कार्यक्रम गरि सहयोग भाव देखाउने गरेको बताए । प्रमुख खरेलले भने, ‘हामीले यहाँका रक्तदाताको सक्रियता देखेर नै रक्त सञ्चार सेवा केन्द्रसंग सहमति गरेर देवदहको परिचयपत्र देखाएमा निशुल्क रगत पाउने व्यवस्था गरेका छौं । जुन रकम नगरपालिकाले एकमुष्ठ रुपमा रक्त सञ्चार सेवा केन्द्रलाई उपलव्ध गराउने गर्छ ।’  

यसैविच रक्तदान कार्यक्रमकै अवसर पारेर बिहिवार वडा कार्यालयमा गर्भवती महिलाहरुको निशुल्क भिडियो एक्सरे तथा परामर्श र महिला पुरुष दुवैमा देखिने बाँझोपन सम्बन्धि परामर्श सेवा उपलब्ध गराइएको छ । जसमा २५ जनाले सेवा लिएको वडा सचिव कमला टण्डनले जानकारी दिइन् । 

सो कार्यक्रममा ११ जना गर्भवती महिलाले भिडियो एक्सरे र परामर्श सेवा लिएको र १ जना पुरुष सहित १४ जनाले बाँझोपन सम्बन्धि परामर्श सेवा लिएको वडा सचिव टण्डनले बताइन् । स्वास्थ्य परिक्षणमा लुम्बिनी प्रादेशिक अस्पतालका गाईनोकोलोजीस्ट डा विष्णु गौतमको टिमले सहजिकरण गरेको थियो ।