देवदह- ५ बालमैत्री वडा घोषणा हुँदै

निश्चल अर्याल
आषाढ २७, २०८१ बिहिवार

अ +
अ
अ -

देवदह । देवदह नगरपालिकाको वडा नं ५ बालमैत्री वडा घोषणा हुने भएको छ । अनुगमनपश्चात जिल्ला समन्वय समितिले बालमैत्री वडा घोषणा गर्न सहमति दिएपछि वडा नं ५ देवदहको पहिलो बालमैत्री वडा हुने भएको हो ।

बुधबार जिल्ला समन्वय समितिले देवदह नगरपालिकालाई पत्र लेख्दै समितिको मंगलबार बसेको बैठकले जिल्लास्तरीय अनुगमन समितिबाट प्राप्त अनुगमन प्रतिवेदन अनुसार बालमैत्री स्थानीय वडा घोषणाका लागी आवश्यक सूचकहरु पुरा भएको देखिएकोले देवदह-५ लाई बालमैत्री वडा घोषणा गर्न सहमति दिइएको जनाएको छ ।

जिल्लाको पत्र प्राप्त भएसंगै असार ३१ गते बालमैत्री वडा घोषणा गर्ने तयारी गरिएको देवदह नगरपालिकाका प्रवक्ता समेत रहेका वडा नं ५ का वडा अध्यक्ष गणेश डुम्रेले जानकारी दिए । "बालमैत्री वडा घोषणा गर्न दुई वर्ष अघिदेखि नै तयारी गरिएको हो । २०८० फाल्गुन २ गते नै बालमैत्री घोषणा गर्ने गरि वडाले तयारी गरेको भएपनि अनुगमनमा ढिलाई भएका कारण तोकिएको समयमा घोषणा गर्न सकिएन ।" वडा अध्यक्ष डुम्रेले भने, "अब भने सबै प्रक्रिया पुरा गरेर जिल्लाबाट पनि सहमति प्राप्त भएको छ । असार ३० गते औपचारिक समारोहबीच बालमैत्री वडा घोषणा गरिन्छ ।"

देवदह नगरपालिकाले बालमैत्री नगर घोषणाको लागि सबै वडालाई बालमैत्री बनाउने योजना अनुरुप यो आर्थिक वर्षमा वडा नं ५ र १० लाई बालमैत्री बनाउने लक्ष्य लिएको थियो ।

२०८२ सम्म सबै वडालाई बालमैत्री वडा घोषणा गरेर देवदहलाई बालमैत्री नगर घोषणा गर्ने तयारीमा अघि बढेको देवदह नगरपालिकाले आर्थिक वर्ष २०८१/०८२ मा वडा नं ६, ७, ८ र ९ लाई बालमैत्री घोषणा गर्ने लक्ष्य लिएको छ ।