देवदह । नेपाली कांग्रेस रुपन्देही क्षेत्र नं १ ले चुनावी प्रचार प्रसार अभियानलाई वडा र टोल केन्द्रित गरेको जनाएको छ । शुक्रबारबाट वडा सम्पर्क कार्यालय उद्घाटन सुरु गरेको कांग्रेसले सनिबार तिलोत्तमा ८, ११ तथा रोहिणी ३ मा निर्वाचन केन्द्रित सम्पर्क कार्यालय स्थापना गरेको छ ।

कार्यालय उद्घाटन समारोहलाई सम्बोधन गर्दै कांग्रेसका उम्मेदवार हिरा बहादुर खत्रीले क्षेत्र नं १ मा विकासको गतिलाई तिव्रता दिन आफु चुनावी मैदानमा होमिएको बताए । आफ्नो पार्टीले युवा नेता गगन थापालाई प्रधानमन्त्रीको रुपमा अघि सारेको बताउँदै युवा र भिजनरी नेतृत्वले मात्र देशलाई निकास दिन सक्ने बताए ।

आफु यस क्षेत्रको विकासमा अहोरात्र खटिएको र यहाँका नागरिकको समस्यासँग परिचित रहेकाले ति समस्या समाधानका लागि आफ्नो उम्मेदवारी रहेको खत्रीले बताए । आँफु नेताको रुपमा नभई यस क्षेत्रका किसान र श्रमजिवी वर्गको प्रनिनिधिको रुपमा रहन चाहेको बताए । 

कांग्रेसका क्षेत्रीय सभापति समेत रहेका खत्रीले आफ्ना उम्मेदवारलाई नागरिकले प्रश्न गर्नुपर्ने औंल्याए । ‘म तपाईँले गर्ने प्रश्नबाट टाढा रहन चाहन्न, मैले तपाईहरुलाई झुटा सपना बाड्न पनि चाहन्न ।’ उनले भने, ‘म एकपटक तपाईको मन जित्दै तपाईकै प्रतिनिधित्व गरेर प्रतिनिधिसभामा  यस क्षेत्रका समस्या जोडतोडका साथ राख्न चाहन्छु ।’ 

उम्मेदवार खत्रीले पछिल्लो समय पार्टीमा भएको नेतृत्वको पुस्तान्तरणले समेत नागरिक स्तरमा हौसला बढाएको भन्दै एकढिक्का भएको कांग्रेसले देशव्यापी रुपमा जीत हात पार्दै राजनीतिक दल र सरकारको समेत नेतृत्व गर्ने दावी गरे । 

कार्यक्रममा कांग्रेस केन्द्रिय सदस्य तथा प्रदेश सभा सांसद अव्दुल रज्जाक, निर्वाचन परिचालन कमिटि क्षेत्र नं १ का संयोजक हरिप्रसाद काफ्ले, सह–संयोजक वासुदेव रिमाल, विश्वनाथ यादव, नविनराज आयार्य, मदन पोखरेल, सल्लाहकार मणिप्रसाद शर्मा लगाएत नेता, कार्यकर्ता तथा स्थानीय सर्वसाधारणको उपस्थिति रहेको थियो ।