देवदह । नवलपरासीको सुनवलमा मेयर कप फुटबल प्रतियोगिता सुरु भएको छ । सोमवार एक कार्यक्रम बिच सुनवल नगरपालिकाका नगर प्रमुख विमला अर्यालले आठौं मेयर कपको उद्घाटन गरेकी हुन् ।  

उद्घाटन समारोहलाई सम्बोधन गर्दै नगर प्रमुख अर्यालले सुनवल नगरपालिका खेलकुदको विकासमा प्रतिबद्ध भएर लागेको बताइन् । ‘हामी एक वडा एक खेल मैदान बनाउने उद्धेश्यले काम गरिरहेका छौं ।’ उनले भनिन्, ‘सुखी सुनवलवासी, समृद्ध सुनवल बनाउने हाम्रो सपनालाई खेल क्षेत्रले सहयोग पुर्याउनेछ भन्ने हाम्रो विश्वास छ ।’ मेयर कपजस्ता खेलकुदका कार्यक्रमले खेलाडीलाई प्रोत्साहन गर्ने र खेलको विकास गर्ने कार्यमा सहयोगी भुमिका खेल्ने उनको भनाइ छ । 

कार्यक्रममा बोल्दै  नगर उपप्रमुख सुर्यप्रसाद दुबेले उत्कृष्ट खेलाडीलाई सुचिकृत गर्ने र उनीहरुलाई आवश्यक सहयोग गरी राष्ट्रियस्तरका खेलाडी उत्पादन गर्न नगरपालिकाले योजना बनाउनुपर्ने बताए । ’खेलाडी उत्पादनका हिसावले मेयरकपबाट समग्र एउटा टिम निर्माण गरेर क्षेत्रीय हुँदै राष्ट्रिय खेलहरुमा समेत सुनवलबाट हामी प्रतिनिधित्व गराउन चाहन्छौं ।’ दुवेले भने, ‘हामि यहाँबाट व्यवसायिक खेलाडी उत्पादन गर्न चाहन्छौं । यदि हामीले सञ्चालन गर्ने प्रतियोगिताबाट त्यस्ता खेलाडी उत्पादन हुन सकेनन् भने मेयरकप प्रतियोगिता माथि नै प्रश्न चिन्ह उठ्नेछ ।’

सुनवल–७ स्थित खेल मैदानमा आयोजित उद्घाटन समारोहमा वडा नं ७ का वडा अध्यक्ष नारायण प्रसाद आचार्य लगायतले बोलेका थिए । मेयर कप सञ्चालन तथा व्यवस्थापन समितिका अध्यक्ष ओम प्रकाश बाह«घरेको अध्यक्षता रहेको कार्यक्रमको सञ्चालन समितिका सचिव खड्ग रानाले गरेका थिए । 

सुनवल मेयर कपको पुरस्कार राशी यस क्षेत्रकै सर्वाधिक रहेको छ । प्रतियोगिता विजेताले एक लाख ५५ हजार नगदसहित शिल्ड, मेडल र प्रमाणपत्र प्राप्त गर्नेछ । त्यसैगरी उपविजेताले ९५ हजार नगदसहित शिल्ड, मेडल र प्रमाण पत्र प्राप्त गर्नेछ भने सेमिफानल पुग्ने दुई टिमलाई २५÷२५ हजार रुपैंया नगद प्रदान गरिनेछ ।

सुनवल नगरपालिकाको १० लाख रुपैंया बजेटमा हुने प्रतियोगितामा सहभागी खेलाडीको प्रतिव्यक्ति एक लाख रुपैंया बराबरको दुर्घटना विमा समेत गरिएको आयोजकले जनाएको छ । प्रतियोगितामा सहभागी हरेक वडालाई आयोजकले एक÷एक थान बल र एक सेट जर्सी उपलब्ध गराएको छ । प्रतियोगितामा आयोजक वडाका दुई टिमसहित १३ वटा वडाका १४ टिम सहभागी छन् । प्रतियोगिताको फाइनल खेलसहित समापन समारोह जेठ ४ गते हुने जनाइएको छ ।   

यसैबिच प्रतियोगिता अन्तर्गत सोमवार सम्पन्न उद्घाटन खेलमा सुनवल– १२ विजयी भएको छ । आयोजक वडा सुनवल–७ ‘ए’ लाई ट्राईवेकरमा ३–१ ले पराजित गर्दै वडा नं १२ विजयी भएको हो । निर्धारित समय अवधिभर दुवै टिमले १–१ गोलको बराबरी खेलेपछि प्रतियोगिता ट्राइवेकरमा पुगेको थियो  । ट्राईवेकरमा सुनवल–१२ ले सुनवल ७ लाई ३–१ गोल अन्तरले पराजित गरेको सचिव रानाले जानकारी दिए ।