महामारीमा महान कार्य

रगतको जोहो गर्न अर्घाखाँचीसम्म पुग्यो रक्तदाता समाज, एकैदिन १३५ युनिट रगत संकलन

सेतोमसी
जेठ ३०, २०७८ आइतवार

रगतको जोहो गर्न अर्घाखाँचीसम्म पुग्यो रक्तदाता समाज, एकैदिन १३५ युनिट रगत संकलन

अ +
अ
अ -

बुटवल । नेपाल स्वयंसेवी रक्तदाता समाज रुपन्देही जिल्ला शाखाले एकैदिन दुई स्थानमा गरेकाे रक्तदान कार्यक्रममा १३५ जना स्वयंसेवी रक्तदाताले रक्तदान गरेका छन ।

रक्तदान कार्यक्रम शहर केन्द्रित मात्र नभएर गाउँमा पनि विस्तार गर्ने उद्देश्य सहित अर्घाखाँचीकाे सन्धिखर्कमा आयोजना गरिएको बृहत् रक्तदान कार्यक्रममा १२ जना महिला सहित ७० जना स्वयंसेवी रक्तदाताहरुले रक्तदान गरेका छन् । जसमा ९० प्रतिशतभन्दा धेरै रक्तदाताहरुले पहिलाे पटक रक्तदान गरेको नेपाल स्वयंसेवी रक्तदाता समाज रुपन्देही शाखा अध्यक्ष कृष्ण चाैहानले बताए ।

नेपाल विद्यार्थी संघ अर्घाखाँचीको सहकार्यमा सम्पन्न उक्त कार्यक्रममा नेपाल स्वयंसेवी रक्तदाता समाज रुपन्देही शाखा अध्यक्ष कृष्ण चाैहानको अध्यक्षता र सन्धिखर्क नगरपालिकाका प्रमुख कमल भुसालको प्रमुख आतिथ्यता रहेको थियो । कार्यक्रमलाई नेपाल विद्यार्थी संघ अर्घाखाँचीका सभापति भरतमणि भट्टराईले संयोजन गरेका थिए ।

त्यसैगरी, प्रत्येक महिनाकाे अन्तिम शनिवार रक्तदान कार्यक्रम गर्ने तालिका अनुसार शनिबार बुटवल ब्लड बैंकमा ९९ औं मासिक नियमित रक्तदान कार्यक्रममा ६५ युनिट रगत जम्मा भएको कार्यक्रम संयोजक हरि ज्ञवालीले बताए । लिम्घा रुपन्देही सम्पर्क समाज सह-आयोजक रहेको उक्त कार्यक्रमलाई डल्ले बुटवल रेष्टुरेन्टले प्रायाेजन गरेकाे थियाे ।

दुबै कार्यक्रमलाई सफल बनाउन नेपाल स्वयंसेवी रक्तदाता समाज रुपन्देहीका उपाध्यक्ष भीष्म के. सी. लगायतका पदाधिकारी तथा व्लड बैंकका प्राविधिक हरि सापकाेटा र चन्द्र बहादुर झेडिको विशेष भुमीका रहेको स्वयंसेवी रक्तदाता समाज रुपन्देहीले जनाएको छ ।