कोरोना महामारी

चालु आर्थिक बर्षको विकास बजेट कोभिड नियन्त्रणमा खर्चिन नागरिक समाजको अनुरोध

सेतोमसी
बैशाख २५, २०७८ शनिवार

चालु आर्थिक बर्षको विकास बजेट कोभिड नियन्त्रणमा खर्चिन नागरिक समाजको अनुरोध

अ +
अ
अ -

देवदह । नागरिक समाज देवदहले नगरपालिकाको चालु आर्थिक वर्षको विकास बजेट पूर्णरुपमा कोभिड नियन्त्रण र उपचारमा खर्चिन अनुरोध गरेको छ । समाजका अध्यक्ष कृष्ण प्रसाद पौडेल र सचीव डासिराम पाण्डेद्वारा जारी एक प्रेस बिज्ञप्तिमा उक्त अनुरोध गरिएको हो ।

देवदह नगरपालिकाबाट कोभिड -१९ को लक्षण देखिएका बिरामीको निशुल्क पिसिआर परिक्षणको प्रवन्ध मिलाइएकोमा खुसी ब्यक्त गर्दै समाजले नगरवासिको ज्यूज्यानको रक्षाको लागि देवदह नगरपालिकाको अगुवाईमा नगरभित्र रहेका राजनीतिक दल, संघ/संस्था सुरक्षा निकाय, स्वास्थ्यकर्मि लगायतका सरोकारवालासँग तत्काल सहयोग र समन्वय गरी विषम परिस्थितिको सामना गर्नको लागी देवदह नगरपालीकालाई अनुरोध समेत गरेको छ ।

साथै नागरिक समाजले क्षेत्रगत रुपमा कम्तिमा ६ स्थानमा दैनिक रुपमा कोभिडको लक्षण देखिएका विरामीहरुको स्वाब संकलन तथा परिक्षण गर्ने प्रवन्ध गर्नुको साथै आइसोलेसन सेन्टरमा पर्याप्त मात्रामा वेड संख्या र अक्सिजन तथा कोभिड विशेषज्ञ सहितको चिकित्सा सेवाको माग समेत गरेको छ ।

आफुहरू देवदह नगरपालिकासँग हरतरहले सहयोग र समन्वय गर्न तयार रहेको बताउँदै बिज्ञप्तिमा कोभिड विरुद्धको अभियानमा
सरिक भई आफूसँग भएका श्रोत-साधन, सीप र दक्षता उपलब्ध गराई नगरवासिको ज्यू ज्यानको लागि मानवीय सभ्यता र संवेदनशिलता प्रर्दशन गर्नुहुन नगरभित्रका सम्पूर्ण संघसंस्था एवं नगरवासीमा अपिल गरिएको छ ।