दाङ । लुम्बिनी प्रदेश सरकारले स्वास्थ्य सेवालाई गुणस्तरीय, सहज र प्रविधिमैत्री बनाउने उद्देश्यसहित १३ बुँदे देउखुरी घोषणापत्र जारी गरेको छ। स्वास्थ्य मन्त्रालयले आर्थिक वर्ष २०८२र८३ मा सञ्चालन गरेका स्वास्थ्य कार्यक्रमको प्रदेशस्तरीय वार्षिक समीक्षा सम्पन्न गरेपछि घोषणापत्र जारी गरिएको हो ।

समीक्षा उद्घाटन गर्दै मुख्यमन्त्री चेतनारायण आचार्यले स्वास्थ्य क्षेत्रमा थप सुधार आवश्यक रहेको भन्दै प्रभावकारी कार्यसम्पादन गर्न निर्देशन दिएका थिए । घोषणापत्रमा आयुर्वेद औषधि उत्पादन, अस्पताल सेवाको गुणस्तर सुधार, विद्युतीय स्वास्थ्य अभिलेख, सुरक्षित मातृत्व, पोषण, नसर्ने रोग तथा मानसिक स्वास्थ्य व्यवस्थापन र बेरुजु न्यूनीकरण लगायतका विषय समेटिएका छन् ।

प्रदेशमा पाइने जडीबुटीको संरक्षण र दिगो उपयोग गर्दै आयुर्वेद औषधि उत्पादन केन्द्र स्थापना गर्ने तथा औषधिमा आत्मनिर्भर बन्ने लक्ष्य राखिएको छ । कपिलवस्तु, बाँके र बर्दियालाई आरोग्य तथा स्वास्थ्य पर्यटनका गन्तव्यका रूपमा विकास गर्ने घोषणा गरिएको छ । कपिलवस्तु आयुर्वेद चिकित्सालयलाई पञ्चकर्म, योग, ध्यान तथा पुनर्स्थापना सेवासहित विशिष्टीकृत केन्द्रका रूपमा विकास गरिने भएको छ ।

प्रदेश अस्पताल तथा आयुर्वेद चिकित्सालयमा पूर्ण विद्युतीय स्वास्थ्य अभिलेख प्रणाली लागू गर्ने, स्थानीय तहका स्वास्थ्य संस्थामा विद्युतीय स्वास्थ्य सूचना प्रणाली विस्तार गर्ने तथा तथ्यमा आधारित स्वास्थ्य नीति र योजना निर्माणलाई संस्थागत गर्ने प्रतिबद्धता गरिएको छ ।
त्यस्तै, सुरक्षित मातृत्व अभियान, कुपोषण न्यूनीकरण, नसर्ने रोग तथा मानसिक स्वास्थ्य व्यवस्थापन, स्वास्थ्य संस्थाबीच प्रभावकारी बिरामी प्रेषण प्रणाली र चिकित्सकीय सेवाको परीक्षण तथा मूल्याङ्कनलाई प्राथमिकता दिइएको छ ।

स्वास्थ्य मन्त्रालय र मातहतका निकायमा सुर्तीजन्य पदार्थ तथा अस्वस्थकर खानपान निषेध गर्ने, स्थानीय जडीबुटीबाट उत्पादित चियाको प्रवर्द्धन गर्ने तथा असुल र पेश्की बेरुजुलाई शून्यमा झार्ने लक्ष्यसमेत घोषणापत्रमा राखिएको छ ।

यसैगरी, थालसेमिया, सिकलसेल तथा हेमोफिलियाका वाहक र बिरामीको प्रभावकारी अभिलेखीकरणका लागि जैविक पहिचानसहितको विद्युतीय अभिलेख प्रणाली स्थापना गर्ने घोषणा गरिएको छ ।