प्रतिनिधिसभा निर्वाचन

मेरो कार्यकालमा विकासका काम तिव्र रुपमा अघि बढे : पूर्व सांसद विश्वकर्मा

सेतोमसी
माघ २१, २०८२ बुधवार

मेरो कार्यकालमा विकासका काम तिव्र रुपमा अघि बढे : पूर्व सांसद विश्वकर्मा

file photo

अ +
अ
अ -

देवदह । रुपन्देही क्षेत्र नं १ का पूर्व सांसद छविलाल विश्वकर्माले आफ्नो कार्यकालमा रुपन्देही क्षेत्र नम्बर १ को विकास तीव्र रूपमा अघि बढेको बताएका छन् ।

नेकपा एमालेको चुनावी अभियान अन्तर्गत तिलोत्तमा-१२ मा निर्वाचन परिचालन सम्पर्क कार्यालय उद्घाटन समारोहलाई सम्बोधन गर्दै उनले सरकार परिवर्तनका कारण क्षेत्रमा संचालन भएका केही योजनाहरू अधुरा रहको उल्लेख गरे । एमाले पुनः सरकारमा आएमा ती सबै काम पूरा हुने भएकाले वर्तमान उम्मेदवार दधिराम न्यौपानेलाई जिताउन क्षेत्रबासी लाग्नुपर्ने उनले बताए ।

सोही कार्यक्रममा बोल्दै प्रतिनिधिसभा सदस्य उम्मेदवार न्यौपानेले देशको समग्र विकास र जनताको आवश्यकताहरू पूरा गर्न सक्ने पार्टी नेकपा एमाले मात्रै भएको दावी गरे । पार्टीका केन्द्रिय सदस्य समेत रहेका न्यौपानेले सुकुम्बासी समस्या समाधानका लागि देवदह नगरपालिकाबाट लालपुर्जा वितरणको शुरुआत गरिएको र बाँकी कामहरू पनि एमालेकै नेतृत्वमा सम्पन्न हुने बताए ।

कार्यक्रममा एमाले रुपन्देहीका अध्यक्ष यज्ञ गैरेले नयाँ भनिएका दलहरूसँग जनताको पक्षमा ठोस योजना नभएको आरोप लगाए । उनले एमालेको नेतृत्वमा विकास र स्थायित्व सुनिश्चित हुने दाबी गरे ।

नेकपा एमाले तिलोत्तमा-१२ निर्वाचन परिचालन समितिका संयोजक यादव अर्यालले बजारमा जति नै हल्ला भएपनि अन्ततः जित एमालेकै हुने दाबी गरे । एमाले तिलोत्तमा-१२ का पूर्व अध्यक्ष डिबी भण्डारीको स्वागत र कार्यवाहक सचिव नागेश्वर यादवको संचालनमा कार्यक्रम भएको हो ।