लोडसेडिङ अन्त्य

लोडसेडिङ अन्त्य राजनीतिक आँटको परिणाम हो : प्रचण्ड

सेतोमसी
भाद्र ११, २०८२ बुधवार

लोडसेडिङ अन्त्य राजनीतिक आँटको परिणाम हो : प्रचण्ड

अ +
अ
अ -

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले लोडसेडिङ अन्त्य केवल प्राविधिक कारणले नभई राजनीतिक आँट र नेतृत्वको भिजनकै कारण सम्भव भएको बताएका छन् ।

पोस्टबहादुर बोगटी स्मृति प्रतिष्ठानद्वारा आयोजित राष्ट्रिय ऊर्जा संवादमा प्रचण्डले गणतन्त्रको पहिलो सरकारले ऊर्जा र कृषिलाई आधारभूत प्राथमिकता दिँदै १० वर्षमा १० हजार मेगावाट उत्पादन गर्ने लक्ष्यसहित क्रान्तिकारी कदम चालेको स्मरण गरे ।

उनले आफ्नो दोस्रो कार्यकालमा ‘उज्यालो अभियान’मार्फत लोडसेडिङ अन्त्य गर्न निर्णायक भूमिका खेलेको उल्लेख गर्दै भने, “जनार्दन शर्मालाई ऊर्जा मन्त्री र कुलमान घिसिङलाई प्राधिकरणको नेतृत्वमा ल्याउने निर्णय नयाँ जनपक्षीय सेटिङ बनाउने राजनीतिक साहस थियो ।”

प्रचण्डका अनुसार, नेपालमा ऊर्जा विकासको सम्भावना प्रशस्त भए पनि पुराना कानुन, नौकरशाहीको परम्परागत सोच र अस्वस्थ प्रतिस्पर्धाले प्रगति अवरुद्ध बनाएको छ । उनले विद्युत् ऊर्जा विधेयक छिट्टै पारित गरी लगानीमैत्री वातावरण बनाउन सबै पक्ष एकजुट हुनुपर्नेमा जोड दिए ।

भारत र बंगलादेशसँग ऊर्जा व्यापारका पहल, किसानको ऋण मिनाहा, राष्ट्रिय गौरवका आयोजनाको अघि बढाइ, शिक्षा र निजामती सेवासम्बन्धी विधेयकजस्ता कदमलाई उनले माओवादी नेतृत्वकै उपलब्धि बताए ।

“यदि राजनीतिक नेतृत्वले आँट र जोखिम लिन सकेको नभएको भए, त्यो क्रान्ति सम्भव हुने थिएन,” प्रचण्डले स्पष्ट पार्दै समृद्ध नेपाल बनाउन सामूहिक संकल्प आवश्यक रहेको बताए ।