सगरमाथामा कक्षा १२ उत्तीर्ण विद्यार्थीलाई सम्मान, देवदहमै धेरै विद्यार्थी उत्तीर्ण गराएको दावी

सेतोमसी
श्रावण २२, २०८२ बिहिवार

सगरमाथामा कक्षा १२ उत्तीर्ण विद्यार्थीलाई सम्मान, देवदहमै धेरै विद्यार्थी उत्तीर्ण गराएको दावी

अ +
अ
अ -

देवदह । सगरमाथा आवासीय माध्यमिक विद्यालयले कक्षा १२ को परिक्षामा उत्तीर्ण विद्यार्थीलाई सम्मान गरेको छ । बिहिवार एक कार्यक्रम बीच विद्यालयबाट कक्षा १२ मा ग्रेडेड भएका १४४ जना विद्यार्थीलाई सम्मान गरेको हो ।

विद्यालयका प्राचार्य कृष्ण प्रसाद पौडेलले सगरमाथाले देवदहमा सबैभन्दा धेरै विद्यार्थी उत्तीर्ण गराएको बताए । उनले सगरमाथाबाट ३.६ देखि ४ जिपिए ल्याउने विद्यार्थीको संख्या ८ जना रहेको उल्लेख गर्दै विद्यालयले उत्कृष्ट नतिजा ल्याएको बताए । अन्य विद्यालयबाट १४४ जना विद्यार्थी उत्तीर्ण नभएको उल्लेख गर्दै उनले संख्यात्मक हिसाबले सगरमाथा नगरमै उत्कृष्ट भएको दावी गरे ।

विद्यार्थी सम्मान कार्यक्रममा बोल्दै स्वर्णिम सगरमाथा क्याम्पसका अध्यक्ष हिराबहादुर खत्रीले कक्षा १२ उत्तीर्ण विद्यार्थीलाई देवदहकै क्याम्पसमा अध्ययन गर्न आग्रह गरे । देवदह नगरपालिकाका पुर्व नगरप्रमुख समेत रहेका खत्रीले देवदह शिक्षाको सम्भावना बोकेको नगर भएको उल्लेख गरे ।

कार्यक्रममा शतप्रतिशत नतिजा दिने शिक्षकहरु विमल तिवारी, दिपेशविक्रम मल्ल, प्रदिप अधिकारी, सर्मिला केसीलाई समेत सम्मान गरिएको छ । उनीहरुलाई जनही पाँच हजार रुपैयाँ सहित सम्मान गरिएको जनाइएको छ ।

सगरमाथाबाट कक्षा १२ को परिक्षामा सहभागी १७७ जना विद्यार्थीमध्ये १४४ जना उत्तीर्ण भएका थिए । विद्यालयबाट ३.६ देखि ४ जिपिए ल्याउने ८ जना, ३.२ देखि ३.६ ल्याउने ४६ जना, २.८ देखि ३.२ ल्याउने ५१ जना, २.४ देखि २.८ ल्याउने ३९ जना विद्यार्थी रहेका छन् । सगरमाथाका विवेक भण्डारीले ३.७५, निषेध अदैले ३.७३ र पुर्णिमा पाण्डेले ३.७१ जिपिए प्राप्त गरेका छन् ।