राजनीति

‘सुशासन र रोजगारीले जनता र पार्टीलाई जोड्छ : रामकुमारी झाँक्री

सेतोमसी
जेठ २७, २०८२ मंगलवार

‘सुशासन र रोजगारीले जनता र पार्टीलाई जोड्छ : रामकुमारी झाँक्री

अ +
अ
अ -

काठमाडौँ । नेकपा (एकीकृत समाजवादी)की स्थायी कमिटी सदस्य रामकुमारी झाँक्रीले ‘सुशासन र रोजगारी, समाजवादको तयारी’ जनता र पार्टीलाई जोड्ने मुद्धा भएको बताएकी छन् ।

मंगलवार नेकपा (एकीकृत समाजवादी) काभ्रे, मण्डनदेउपुर नगर कमिटीले आयोजना गरेको कोण सभालाई सम्बोधन गर्दै नेता झाँक्रीले उक्त कुरा बताकी हुन् । उनले भनिन्, ‘हामीले पार्टी निर्माणका निम्ति सुशासन र रोजगारी समाजवादको तयारी भन्ने मुलनारा बनाएर जनताको बीचमा आइरहेका छौं । यो पार्टी र जनता जोड्ने कार्यक्रम हो । यो कुनै जुलुस नाराबाजी गर्ने आन्दोलन होइन । यो रचनात्मक र सकारात्म कार्यक्रम हो । सार्वजनिक छलफल, विचार विमर्श गर्ने कार्यक्रम हो ।’

झाँक्रीले शिक्षा, स्वास्थ्य, रोजगार, पहुँचमा, सहभागितामा तुलनात्मक रुपमा परिवर्तन भएको बताउदै केही समाज विरोधि तत्वहरुले जनतालाई दिग्भ्रमित पार्ने काम गरिरहेको दाबी गरिन् । उनले विगत ५० वर्ष पहिले भोगेको समाज, विगत ३० वर्षदेखि यताको समाज र हालै १० वर्ष यताको समाजको गुणस्तर एउटै नभएको उल्लेख गरिन् ।

उनले अनवाश्यक रूपमा नकारात्मक भाष्य खडा गरेर समाज भाड्न नपाईने बताईन् । उनले भनिन्, ‘के सत्य हो ? के असत्य हो ? त्यसको बारेमा जनतालाई भन्नुपर्छ । अनि सबै राम्रो भएको छ त ? छैन । समाजमा कुनै न कुनै सामाजिक समस्या छन्। आम प्रश्न यो होइन, समाधान गर्न सकिने र गर्नुपर्ने कुरा के हो ? त्यो मुख्य कुरा हो ।’

झाँक्रीले आफूबाहेक अरु सबै खराब हुने भन्ने मान्यता स्थापित गर्न खोजिएको बताइन् ।