सेयर बजार ६ महिनाकै उच्च विन्दुमा, यी हुन् धेरै कमाउने ७ कम्पनी

सेतोमसी
फाल्गुण १६, २०८१ शुक्रवार

सेयर बजार ६ महिनाकै उच्च विन्दुमा, यी हुन् धेरै कमाउने ७ कम्पनी

अ +
अ
अ -

काठमाडौं । सेयर बजार हाल ६ महिनाकै उच्च विन्दुमा पुग्दै २८१५ अंकमा कायम भएको छ । यो अंक १८ भदौ यताकै उच्च हो । साउन ३१ गते ३ हजार अंकमा पुगेको बजार त्यसयता १३ असोजमा न्यूनतम विन्दु २४६४ अंक कायम भएको थियो । अहिले फेरि बजार बढ्दो लयमा छ ।

‘हायर लो, हायर हाइ’ ट्रेन्ड बनाएको बजारमा कतिपय कम्पनीको मूल्यमा भने नयाँ रेकर्ड बनेको छ । विगतमा दिएको हकप्रद सेयर वा बोनस सेयर समायोज नपछि नयाँ मूल्यको रेकर्ड बनेको हो ।

यहीं बेला ७ कम्पनीको मूल्य हालसम्मकै उच्च विन्दुमा पुगेको छ । यसरी मूल्य उच्च विन्दुमा पुगेका कम्पनीमा ३ वटा हाइड्रोपावर सेक्टरका छन् भने एउटा जीवन बीमा, एउटा विकास बैंक, एउटा अन्य, र एउटा लगानी सेक्टरको रहेको छ ।

कारोबारकै क्रममा (इन्ट्राडे) मा किनिएको सेयरबाहेक यी ७ कम्पनीका करिब सबैजसो सेयरहोल्डर नाफामा छन् । तसर्थ यी कम्पनीको सेयर यतिबेला नाफा बुक गरेर बेच्नका लागि अवसर हुन सक्छ । यस्ता कम्पनीको मूल्य थप बढ्ने अनुमानका बीच कतिपयले खरिद पनि बढाउने गरेका छन् ।

उच्च मुल्य पुगेका कम्पनीको सेयरमा जोखिम पनि बढी हुनेतर्फ भने लगानीकर्ता सचेत रहन जरुरी छ । विगतमा उच्च मूल्यमा पुगेका कतिपय फाइनान्स कम्पनी अहिले आधा घटेका उदाहरण छन् ।

कम्पनी	सेक्टर	पछिल्लो मूल्य
नारायणी विकास बैंक	बैंक	१६११.८०
एनआरएन इन्फ्रास्ट्रक्चर	लगानी	१५५४.८०
गार्डियन माइक्रोलाइफ	जीवन बीमा	१०३८
हिमालयन रिइन्स्योरेन्स	अन्य	१०२९.९०
नेपाल हाइड्रो डेभलपर्स	हाइड्रोपावर	९९७.६०
अपर हेवाखोला	हाइड्रोपावर	९९३.३०
मोलुङ हाइड्रोपावर	हाइड्रोपावर	६५०