साहित्य

कविता : तिमी नेता बन्ने भयौ

सेतोमसी सहकर्मी

अ +
अ
अ -

केहि गर्नु र नगर्नुको बीच
खाडल बाँकी नरहेपछि
राजनीति सुरु गरेको तिमीले
केही नगरीकनै
धेरै समाचारका हेडलाइनमा
केही गर्न सफल भएकोमा
तिम्लाइ धेरै धेरै बधाइ छ ।

राजनीति गर्नु भनेको
सत्ता र सम्पदा दोहन गर्नु बुझेरै
राजनीतिमा उदाएको तिमी
देशको भविष्य छर्लङ्ग देखाइ दिएकोमा
तिम्लाइ धेरै धेरै धन्यवाद छ ।

सरकारी आरक्षण र कोटाहरुमा
भनसुनको मनसुन
बर्षाउन पाइन्छ भनेरै
तिमी राजनीतिमा आइसकेपछी
मेरा केही साथीहरुको
बुझ्न् नसक्दै सकिएको
एउटा कहानी को अध्याय निमोठिदिएकोमा
तिम्लाइ धेरै धन्यवाद छ
तिम्लाइ धेरै धन्यवाद छ ।।
हो,
हो, तिम्लाइ धन्यवाद छ
पैसा कमाउनको लागि कर्म गर्नुपर्ने
ठाउँसम्म पुर्याइदिने
वातावरण सृजना गरिएकोमा
तिम्लाइ धेरै धन्यवाद छ ।

अभावमा बरु आनन्द मिल्ला भनेरै
सम्पन्नताको आसमा गलत कहिलै गरेन उसले
संघर्षमा हुर्केका फूलहरु
फक्रन अलि समय लाग्छ दाई
तिमी बस हिम्मत नहार्नु,भन्ने साथीलाई
पासपोर्ट थमाईदिएर
तिम्लेले देशलाई जित्यौ
देशले उस्लाइ बिदा गर्यो
तिम्लाइ धेरै धेरै बधाइ छ ।
तिम्लाइ धेरै धेरै बधाइ छ ।।

पृथ्वीको गर्भ तोडेर
भएपनि ताला खोल्न सक्ने
झुप्पाका अन्तिम चाबी जस्तै
निर्बिकल्पको साचो माला लगाएका
मेरा साथीहरूलाई
विदेश यात्रा सफल अनि सहज होस भन्न सक्ने
आट दिएकोमा तिम्लाइ धेरै धेरै धन्यवाद ।

आकाशमा अट्ने जति सपना बोकेर,
बाकसमा अटने जति पैसा कमाउन
घरको लालपुर्जा
उस्को बा'ले
बैंकको बाकसमा
राख्नसक्ने बनाइदिएकोमा
तिम्लाइ धेरै धन्यवाद ।

गरुङ्गो मन लिएर
खाली कागजमा
उस्का बा'ले
औठा छाप
बैङ्कमा धितो राखेपछी
उसकी आमाले
तिउनमा नुन हाल्न बिर्सेकै भोलिपल्ट
उसको बोरिङ पास भएको छ
तिमी सफल भएका छौ
अब तिमी ठुलै नेता भयौ
धेरै धेरै बधाइ छ ।
धेरै धेरै बधाइ छ ।।

विष्णु प्रसाद पाठक
देवदह, रुपन्देही