काठमाडौं । एमाले नेता माधव नेपाल सहित ४ दलले प्रधानमन्त्री र राष्ट्रपतिको कदमले महामारीको पिडामा रहेका जनतालाई थप दुःख र कष्टको भुमरीमा धकलेको बताएका छन् । शनिबार संयुक्त प्रेस वक्तव्य जारी गर्दै नेताहरूले यस्तो बताएका हुन् ।

प्रधानमन्त्री र राष्ट्रपतिले संसदबाट अनिवार्य विश्वासको मत लिने प्रक्रियामा सहभागी हुनुपर्ने संविधानको बाध्यकारी नियमलाई समेत नमानी नियोजीत रुपमा नयाँ सरकार गठनको प्रक्रिया सुरु गराई अन्ततः संसद विघटन गरिनु असंवैधानिक भएको बक्तव्यमा उल्लेख छ ।

वक्तव्यमा अगाडि भनिएको छ - "प्रतिनिधि सभालाई रातारात विघटन गर्ने राष्ट्रपति र प्रधानमन्त्रीको असंवैधानिक, अलोकतान्त्रिक, स्वेच्छाचारी निरंकुश र प्रतिगमनकारी कार्यको हामी घोर निन्दा र भत्र्त्सना गर्दछौँ । राष्ट्रपति र प्रधानमन्त्रीको प्रतिनिधि सभा विघटन गरी मुलुकमा राजनीतिक अनिश्चय, अन्योल र अराजकता सिर्जना गर्ने असंवैधानिक, अलोकतान्त्रिक र प्रतिगमनकारी कार्यका विरुद्ध एकताबद्ध भई राजनीति र कानुनी रुपमा सशक्त किसिमले प्रतिवाद गर्न हामी कटिबद्ध छौं ।"

कांग्रेस सभापती शेर बहादुर देउवा, माओवादी केन्द्रका अध्यक्ष पुष्पकमल दाहाल 'प्रचण्ड', एमाले नेता माधवकुमार नेपाल, जनता समाजवादीका अध्यक्ष उपेन्द्र यादव र राष्ट्रिय जनमोर्चाकि अध्यक्ष दुर्गा पौडेलद्वारा हस्ताक्षरीत वक्तव्यमा राष्ट्रपति र प्रधानमन्त्रीबाट प्रतिनिधिसभाको विघटन गर्ने कार्य प्रतिगनकारी कार्यभएको उल्लेख गर्दै एकजुट भई नेपाली जनताको लामो आन्दोलन, संघर्ष र बलिदानबाट स्थापित नेपालको संविधानमा अन्तर्निहित संघीय लोकतान्त्रिक गणतन्त्र, सामवेशी लोकतन्त्र एवम् नेपालको सर्वोपरी राष्ट्रिय हितको रक्षाका लागि दृढतापूर्वक अगाडि बढ्न सम्पूर्ण राजनीतिक दल तथा जनसमुदायमा हार्दिक आव्हान गरिएको छ ।