महामारीमा महान कार्य

सुप, पानी, चिया र अण्डा वितरणसंगै शव पनि नि:शुल्क व्यवस्थापन गर्दै माओवादी केन्द्र

सेतोमसी
जेठ ६, २०७८ बिहिवार

सुप, पानी, चिया र अण्डा वितरणसंगै शव पनि नि:शुल्क व्यवस्थापन गर्दै माओवादी केन्द्र

अ +
अ
अ -

भैरहवा । नेपाल कम्युनिष्ट पार्टी (माओवादी केन्द्र) सिद्धार्थनगर नगर कमिटी, रुपन्देहीले कोरोनाको संक्रमण भएर भीम अस्पतालमा रहेका बिरामीका लागि निःशुल्क तातो पानी, बेसार, ज्वानो पानी, चिया र अण्डा वितरण संगै कोरोना संक्रमणबाट मृत्यु भएका शवको समेत नि:शुल्क व्यवस्थापन गर्दै आएको छ ।

गत शनिबारदेखि सुरु गरिएको उक्त अभियान हालसम्म पनि जारी रहेको र महामारी अन्त्य नहुदासम्म जारी नै रहने माओवादी केन्द्र सिद्धार्थनगर इञ्चार्ज तीर बहादुर रोकाय (डार्बिन) जानकारी दिए ।

माओवादी केन्द्रले भैरहवामा दिनको तीन पटक बिहान ७ बजेदेखि ९ बजेसम्म, दिउँसो १२ देखि २ बजे र सांझ ५ देखी ७ बजेसम्म बिरामीलाई आवश्यकता अनुसार तातो पानी, बेसार, ज्वानो पानी, चिया र अण्डा वितरण गर्दै आएको छ ।

कोरोनाका कारण अस्पतालमा भर्ना भएका बिरामी र बिरामी कुरुवाहरुका लागि आवश्यक पर्ने खानेकुराहरु स्थानीय बजारमा निषेधाज्ञा जारी भएपछि पाउन छाडेकाले पार्टीले निःशुल्क रुपमा वितरण गर्न सुरु गरेको पार्टीका विद्यार्थी नेता तुल्सी प्रसाद न्यौपाने (टी. पी.) ले बताए ।

त्यसै गरि योङ्ग कम्युनिस्ट लिग ( वाइसीएल) नेपालको विशेष नेतृत्वमा कोरोना संक्रमणबाट दिवंगत भएका शवहरु समेत नि:शुल्क सम्बन्धित परिवारले अनुरोध गरेको स्थान सम्म पुर्याइदिने र अन्त्यष्टीका अन्य कार्यहरुमा पनि आवश्यकता अनुसार मृतकका परिवारसंग सहकार्य गर्दै आएको र महामारी अवधीभरी उक्त कार्य गरिनै रहने वाइसीएल नगर संयोजक दिलिप प्रजापतिले बताए ।