समाचार

महानिरीक्षक कार्कीसँग एशिया प्रशान्त क्षेत्रीय सम्पत्ति शुद्धीकरण निगरानी समूहका स्यानन र सासालको भेटवार्ता

सेतोमसी
जेठ ५, २०८३ मंगलवार

महानिरीक्षक कार्कीसँग एशिया प्रशान्त क्षेत्रीय सम्पत्ति शुद्धीकरण निगरानी समूहका स्यानन र सासालको भेटवार्ता

अ +
अ
अ -

काठमाडौँ । प्रहरी महानिरीक्षक दानबहादुर कार्की र एशिया प्रशान्त क्षेत्रीय सम्पत्ति शुद्धीकरण निगरानी समूहका उपकार्यकारी सचिव डेभिड स्यानन तथा नीति अधिकृत किआ सासालबीच शिष्टाचार भेटवार्ता भएको छ ।

मंगलबार नेपाल प्रहरी प्रधान कार्यालयमा भएको भेटका क्रममा सम्पत्ति शुद्धीकरण सम्बन्धी सघन निगरानी सूचीबाट नेपाललाई बाहिर निकाल्न तयार गरिएको कार्ययोजना र त्यसमा नेपाल प्रहरीको भूमिकाबारे विस्तृत छलफल भएको थियो ।

छलफलमा सम्पत्ति शुद्धीकरण नियन्त्रण प्रणालीमा अन्य सरोकारवाला निकायसँग नेपाल प्रहरीले गरिरहेको समन्वय, अनुसन्धान तथा कारबाहीको अवस्था, प्रहरी कर्मचारीको क्षमता अभिवृद्धि, प्राविधिक सहयोग र आगामी कार्यदिशाबारे पनि कुराकानी भएको थियो ।

त्यस अवसरमा वित्तीय अपराध नियन्त्रणका लागि सूचना आदानप्रदान, आपसी सहयोग र समन्वयलाई थप प्रभावकारी बनाउने विषयमा समेत छलफल गरिएको नेपाल प्रहरीले जनाएको छ ।

कार्यक्रममा वित्तीय जानकारी इकाईका प्रमुख तथा पदाधिकारी, प्रधानमन्त्री तथा मन्त्रिपरिषद्को कार्यालयका सहसचिव, नेपाल राष्ट्र बैंकका निर्देशक तथा पदाधिकारी, प्रहरी नायव महानिरीक्षक र वरिष्ठ प्रहरी अधिकृतहरूको उपस्थिति रहेको थियो ।