देवदह । जनप्रिय सामुदायिक वन उपभोक्ता समूह देवदहले यस आर्थिक वर्षमा १० हजार ७ सय ६४ क्यूफिट वन पैदावर (काठ) संकलन गर्ने भएको छ । डिभिजन वन कार्यालय रुपन्देहीले वन व्यवथापन कार्ययोजना २०७९ बमोजिम यस आर्थिक बर्षमा सो परिमाणको काठ दाउरा संकलनको लागि समुहलाई सहमति प्रदान गरेको हो ।

समहति वमोजिम समूहले पुनरोत्पादन कटान तर्फ विभिन्न जातका ९ हजार ६२।८४ क्यू फिट र ढलापडा तर्फ १ हजार ७०२।१४  क्यूफिट काठ संकलन गर्ने कार्यबाहक अध्यक्ष टेकबहादुर विकले जानकारी दिए ।

सहमतिमा आवधिक खण्ड नं १ को उपखण्ड ७ मा पुनरोत्पादन कटान तर्फ ४ हजार ८४१।५५ क्यूफिट साल, २ हजार ९५४।१२ क्यू फिट असना र अन्य प्रजातिका १ हजार २६७।१७ क्यूफिट काठ कटान हुनेछ । त्यसैगरि ढलापडा तर्फ १ हजार २४६।१२ क्यू फिट साल र अन्य विभिन्न जातका ४५६।०२ क्यू फिट काठ संकलन हुने कार्यवाहक अध्यक्ष विकले बताए । 

यस आर्थिक बर्षमा जनप्रियको पुनरोत्पादन तर्फ १९० वटा रुख कटान हुने र ढलापडा तर्फ २३ वटा रुखबाट काठ दाउरा संकलन हुनेछ । जसबाट ४१।०१ चट्टा दाउरा संकलन गर्न समूहले सहमति पाएको छ । सहमति अनुसार समूहले देवदह सव डिभिजन कार्यालय सितलनगरसँग समन्वय गरेर काठ दाउरा सङ्कलन गर्नुपर्नेछ ।

कार्यवाहक अध्यक्ष विकका अनुसार जनप्रिय ले वि.सं २०७० साल देखि वैज्ञाकि वन व्यवस्थापन कार्ययोजना अनुसार काम गरिरहेको छ । जनप्रियले विगत ११ बर्ष अघिबाट वैज्ञानिक वन व्यवस्थापन कार्ययोजना वमोजिम काम गर्दै आएको भएपनि वि.सं २०७९ सालबाट दिगो वन व्यवस्थापनको कार्ययोजनामा रहेर काम गरिरहेको छ ।

‘वैज्ञानिक र दिगो वन व्यवस्थापनबाट काठदाउरा उत्पादन मात्र नभइ बनको हैसियत समेत सुधार भएको छ ।’ कार्यवाहक अध्यक्ष विकले भने, ‘वनबाट प्रत्यक्ष अप्रत्यक्ष रुपमा रोजगारी समेत सृजना भइरहेको छ । किनकी हामीले वनको कामका लागि पहिलो प्राथमिकतामा उपभोक्तालाई नै राख्ने गरेका छौं ।’  

यसैविच सोमवार समूहले वनदेवी पुजा गर्दै यस आर्थिक वर्षको वन पैदावर संकलन अर्थात काठ÷दाउरा कटान मुछान कार्यको सुरुवात गरेको छ । स्थानीय जनप्रतिनिधि, वनका कर्मचारी, समूहका पदाधिकारी, पत्रकार लगाएतको उपस्थितिमा वन पुजा गर्दै कटान मुछान कार्य सुरु गरिएको समुहका कोषाध्यक्ष तथा कटान मुछान संयोजक दुर्गा प्रसाद भुर्तेलले जानकारी दिए ।