आगलागी

देवदह खानेपानीको कम्पाउन्डमा आगलागी, ६ किलोमीटर पाइप जलेर नष्ट

सेतोमसी
चैत्र ९, २०८१ शनिवार

देवदह खानेपानीको कम्पाउन्डमा आगलागी, ६ किलोमीटर पाइप जलेर नष्ट

अ +
अ
अ -

देवदह । रुपन्देहीको देवदहमा खानेपानीको पाइपमा आगलागी भएको छ। वडा नं ७ सावित्री टोलमा रहेको देवदह खानेपानीको बोरिङ रहेको कम्पाउन्डमा आगलागी हुँदा १० लाख बराबरको क्षति भएको प्रहरी चौकी खैरेनीले जनाएको छ।

शनिबार दिउँसो करिब ३:४० बजे फोहोर जलाउने क्रममा हावाको कारणले आगो अनियन्त्रित हुँदै खानेपानीका पाइपमा पुगेको प्रहरी चौकी खैरेनीका इन्चार्ज एक्कबहादुर नेपालीले जानकारी दिए । प्रहरीका अनुसार आगलागीका कारण ६३ एमएमको ३,९०० मिटर, ६६ एमएमको १,९०० मिटर, ११० एमएमको १,१०० मिटर, १२५ एमएमको ५०० मिटर र २०० एमएमको ३०० मिटर कालो प्लास्टिक पाइप जलेर नष्ट भएका छन्।

आगलागी नियन्त्रण गर्न प्रहरी चौकी खैरेनीबाट प्रहरी निरीक्षक नगेन्द्र बहादुर क्षेत्रीको नेतृत्वमा पाँचजनाको टोली घटनास्थलमा खटिएको थियो। स्थानीयबासी, प्रहरी र देवदह नगरपालिकाको दमकलको सहायतामा बेलुका ४:१५ बजेसम्म आगो पूर्ण रूपमा नियन्त्रणमा लिइएको प्रहरीले जनाएको छ ।

घटनाबारे सेतोमसीसंग कुरा गर्दै देवदह खानेपानीका अध्यक्ष गुमानसिं कुँवरले आयोजनाका लागि खरिद गरिएको ६ किलोमिटर पाइप जलेर नष्ट भएको बताए । "झाडीमा रहेको फोहोर जलाउदा खानेपानीको पाइपमा आगो सल्किएर क्षति भएको छ ।" उनले भने, "केही भाग प्रयोग गर्न मिल्ने देखिए पनि अधिकांश भाग जलेको छ ।"