रेशम अधिकारी, रुपन्देही । एउटा पुल निर्माण करिब १ दशक पुग्न लाग्दा पनि सम्पन्न भएन । सुन्दा अचम्म लाग्छ तर हो,कजरार नदि माथिको पुल निर्माणाधीन अवस्थामा रहेको ८ वर्ष पुग्यो । २०७३ मा  मैनाचुली सिद्धसाही अञ्जना जेबी कन्स्ट्रक्सन कम्पनीसँग ठेक्का सम्झौता भई निर्माण सुरु भएपछि त्यस क्षेत्रका स्थानीय निकै उत्साहित भएका थिए । तर वर्षौ सम्म पुल निर्माणले सम्पन्नता नपाउँदा स्थानीयले आश मारिसकेका छन् । स्थानीयलाई पुल निर्माण नहुदाँ वर्षाको समय नजिकिइसकेकाले नदि वारपार कसरी गर्ने भन्ने विषयले थप पिरोलेको छ । रूपन्देही देवदह केरवानीबाट सुनवल-७, उखुबारी नवलपरासी आउने नजिकको बाटोमा पुल निर्माणाधीन छ । दुई जिल्लाको सेतु भए पनि सेतु निर्माण नहुदाँ स्थानीहरू आवतजावत गर्न पूर्वपश्चिम राजमार्ग प्रयोग गर्न बाध्य छन् । 

ठेकेदार कम्पनीको लापरबाहीले पुल निर्माणमा ढिलासुस्ती 

सडक डिभिजन कार्यालय बुटवलका अनुसार मैनाचुली सिद्धसाही अञ्जना जेबी कन्स्ट्रक्सन कम्पनीले सो पुल २०७५ मा सम्पन्न गर्नुपर्ने थियो । तर म्याद सकिएको थप ५ वर्ष पनि निर्माण सम्पन्न भएको छैन । डिभिजन कार्यालयका सूचना अधिकारी महेश्वर लम्साल भने, "निर्माण व्यवसायीले समयमा काम नगर्दा पुल निर्माणको काम पुरा हुन सकेको छैन ।" सार्वजनिक खरिद ऐनको बिभिन्न एन आउँदा ठेकदारलाई कारवाही गर्न नमिलेकोले असारसम्म काम नसके  कालो सुचीमा राख्ने  सडक विभागको चेतावनी छ । 

सडक डिभिजन बुटवलको फितलो अनुगमन

सडक डिभिजन कार्यालय बुटवलले पनि प्रभावकारी अनुगमन नगरेको स्थानीयको गुनासो । निर्माण कम्पनीले काममा ढिलासुस्ती गर्दा कार्यालयले खासै वास्ता नगरेको स्थानीयको आरोप छ । केवल कम्पनीलाई आरोप लगाएर सडक डिभिजन कार्यलय उम्कन खोजेको स्थानीहरू बताउँछन् । ठेगदार कम्पनीका सुपरभाइजर पंकज राज पाण्डे पनि बिभिन्न चरणमा सडक डिभिजन  कार्यालयले बजेट निकासी नगरिदिँदा काम रोकिएको बताउँछन् । 

स्थानीय एवम् सवारीसाधन चालक निकै जोखिम मोलेर खोला तर्ने गर्छन् । कुल सात करोड ४२ लाखको लागतमा निर्माण सुरु गरिएको पुल  ४२ मिटर लम्बाइको रहेको छ नेपाली काङ्ग्रेस रूपन्देहीका सभापति तथा  प्रदेश सांसद अब्दुल रज्जाकले पुलको शिलान्यास गरेका थिए ।