सडक निर्माणमा प्रगति नभएको सूचनापछि अनुगमनमा निस्किएँ: गृहमन्त्री श्रेष्ठ

सेतोमसी
चैत्र २८, २०७९ मंगलवार

सडक निर्माणमा प्रगति नभएको सूचनापछि अनुगमनमा निस्किएँ: गृहमन्त्री श्रेष्ठ

अ +
अ
अ -

भैरहवा । नेपाल सरकारका उपप्रधान तथा गृहमन्त्री नारायणकाजी श्रेष्ठले सडक निर्माणमा ठेकेदार कम्पनीले उल्लेख्य काम नगरेको सूचनापछि निरीक्षणमा निस्किएको बताएका छन् । मंगलबार प्रेस सेन्टर नेपाल रुपन्देहीले भैरहवामा आयोजना गरेको पत्रकार सम्मेलनमा बोल्दै मन्त्री श्रेष्ठले यस्तो बताएका हुन् ।

"म भौतिक योजना मन्त्री हुँदा नै सडक निर्माणमा उल्लेख्य प्रगति हुन नसकेको सूचना पाएँ र तुरुन्तै मैले त्यसको बारेमा बुझ्दा चिनियाँ कम्पनीले ठेक्का लिएको हुनाले चिनियाँ राजदुत सहित सडक निरिक्षणको योजना बनाएको थिएँ ।" उनले भने, हाल म गृहमन्त्री बनेपछि भौतिक योजना मन्त्री, चिनियाँ राजदूत, सडक बिभागका अधिकारी र ठेकेदार कम्पनीका प्रतिनिधि सहित सडक अनुगमनमा निस्किएको हुँ।"

सडक निर्माण वा कुनैपनि निर्माणको ठेक्का लिएपछि समयमै काम सम्पन्न गर्नुपर्ने बताउँदै गृहमन्त्री श्रेष्ठले लापरबाही गर्नेमाथि कार्वाही हुने बताए ।

नागरिकता विधेयकबारे पत्रकारले सोधेको प्रश्नको जवाफ दिँदै गृहमन्त्री श्रेष्ठले नागरिकता प्राप्त गर्न योग्य नेपाली नागरिकलाई नागरिकता बिहिन नगराउने गरि विधेयक अगाडि बढाईने बताए ।

रुपन्देहीमा केही क्यासिनोहरू विना दर्ता संचालन भैरहेपनि कार्वाही नगरिएको सम्बन्धमा पत्रकारले राखेको जिज्ञासामा मन्त्री श्रेष्ठले अबैध कारोबारीमाथि कार्वाही गरिने उल्लेख गरे ।

बुटवल-नारायणगढ सडक खण्डको अनुगमनमा बुटवल आएका गृहमन्त्री श्रेष्ठले सोमबार रुपन्देही र पाल्पाको सिमा क्षेत्रमा बन्दै गरेको सुरुङमार्गको समेत अनुगमन गरेका थिए ।