नेपाली सेनाद्वारा गिरफ्तार दुई सैनिक अधिकारीलाई अदालतमा उपस्थित गराउन सर्बोच्चको आदेश

सेतोमसी
फाल्गुण १९, २०७९ शुक्रवार

नेपाली सेनाद्वारा गिरफ्तार दुई सैनिक अधिकारीलाई अदालतमा उपस्थित गराउन सर्बोच्चको आदेश

अ +
अ
अ -

काठमाण्डौ । नेपाली सेनाद्वारा गिरफ्तार गरिएका नेपाली सेनाको प्राड विभागका प्रमुख सेनानी कुलदिप तिमसिना र महेन्द्रजंग शाहीलाई अदालतमा उपस्थित गराउन सर्बोच्च अदालतले आदेश दिएको छ।

नेपाली सेनाका उपरथी प्रेम शाहीलाई सहयोग गरेको अभियोगमा नेपाली सेनाले गिरफ्तार गरेका उनीहरुलाई अदालतमा उपस्थित गराउन आज सर्बोच्च अदालतले आदेश दिएको हो । सैनिक मुख्यालयले जंगीअड्डाले भने थुनामा राखेको अस्वीकार गरिरहेको छ । सैनिक प्रवक्ता कृष्णप्रसाद भण्डारीले सोधपुछ मात्रै भइरहेको दाबी गरे ।

जंगीअड्डा स्रोतका अनुसार सेनाले पक्राउ परेलगत्तै गैरकानूनीरुपमा थुनामा राखिएको भन्दै दुवै सैनिक अधिकृतले सर्वोच्च अदालतमा बन्दी प्रत्यक्षीकरणको रिट दिएका छन् । सैनिक अनुशासन विपरितको कार्य गरेको अभियोगमा थुनामा राखिएलगत्तै उनीहरुको तर्फबाट अदालतमा रिट परेको थियो ।

रिटमाथि सुनुवाइ गर्दै न्यायाधीश हरिप्रसाद फुयाँलको इजलासले तीन दिनभित्र दुवै सैनिक अधिकारीलाई उपस्थित गराउन आदेश दिएको हो ।

जंगीअड्डालाई विपक्षी बनाएर दिइएको रिट निवेदनसम्बन्धी संक्षिप्त आदेशमा भनिएको छ, ‘आदेश जारी हुन नपर्ने भए आधार, कारणसहित म्याद सूचना प्राप्त भएको मितिले ३ दिनभित्र महान्यायाधिवक्ताको कार्यालयमार्फत बन्दीसहित लिखित जवाफ पेश गर्नु ।’ अदालतले अनुसन्धान सम्बन्धी मुख्य कागजातहरुको प्रमाणित प्रतिलिपि समेत मगाएको छ ।