समाचार

आत्महत्याको प्रयास रोक्न पुगेका प्रहरीसहित तीन जनालाई छुरा प्रहार

सेतोमसी
आषाढ ७, २०८३ आइतवार

आत्महत्याको प्रयास रोक्न पुगेका प्रहरीसहित तीन जनालाई छुरा प्रहार

अ +
अ
अ -

विराटनगर । मोरङको विराटनगर महानगरपालिका-१ अनुकरण मार्गस्थित एक घरमा बस्दै आएका एक युवकले छुरा प्रहार गर्दा प्रहरीसहित तीन जना घाइते भएका छन्।

मोहन भट्टराईको घरमा कोठा भाडामा लिएर बस्दै आएका करिब २९ वर्षीय रुबिण कार्कीलाई काठमाडौंस्थित सुधार गृह पठाउने तयारी भइरहेका बेला उनले कोठा थुनेर आत्महत्या गर्न खोजेको भन्ने सूचना प्राप्त भएपछि प्रहरी घटनास्थल पुगेको थियो ।

सीआरभी भट्टाचोकबाट प्रहरी सहायक निरीक्षक भोजराज रेग्मीको नेतृत्वमा खटिएको प्रहरी टोलीले सुधार गृहका कर्मचारी र आफन्तसँग मिलेर कार्कीलाई सम्झाइबुझाइ गर्ने प्रयास गरेको थियो ।

सोही क्रममा कार्कीले आफू सुत्ने ओछ्यानमा लुकाइराखेको धारिलो छुरा एक्कासी निकालेर प्रहार गरेका थिए । छुरा प्रहारबाट प्रहरी सहायक निरीक्षक भोजराज रेग्मी, प्रहरी जवान हिमाल घिमिरे तथा साथीभाइ नेपाल सुधार गृहका कर्मचारी सन्तोष सापकोटा घाइते भएका छन् । तीनै जनाको टाउकोमा चोट लागेको प्रहरीले जनाएको छ। उनीहरूको अवस्था सामान्य रहेको छ । घाइतेहरूलाई उपचारका लागि विराटनगरस्थित नोबेल अस्पताल पठाइएको छ ।

घटनाबारे जानकारी प्राप्त हुनासाथ जिल्ला प्रहरी कार्यालय मोरङ र वडा प्रहरी कार्यालय विराटनगरबाट थप प्रहरी टोली परिचालन गरिएको छ । प्रहरीले घटनाबारे थप अनुसन्धान र आवश्यक समन्वयको काम अघि बढाएको जनाएको छ ।