बलिवुड

बलिवुड फिल्म गोलमाल- ५ शुटिंग जारी, मोटरसाइकल विशेष हुने

सेतोमसी
बैशाख १४, २०८३ सोमवार

बलिवुड फिल्म गोलमाल- ५ शुटिंग जारी, मोटरसाइकल विशेष हुने

अ +
अ
अ -

काठमाडौँ । बलिवुड अभिनेता अजय देवगनको बहुप्रतीक्षित चलचित्र गोलमाल- ५ लाई लिएर दर्शकमाझ उत्साह अझ बढेको छ । उनले चलचित्रको छायांकनस्थलबाट नयाँ झलक सार्वजनिक गरेपछि यसको चर्चा थप चुलिएको हो ।

अजयले सामाजिक सञ्जालमार्फत चलचित्रको छायांकनकोको भिडियो सार्वजनिक गर्दै चलचित्रका मुख्य कलाकारहरू र यस श्रृंखलाको चर्चित पाँच सिटे मोटरसाइकल देखाइएको छ, जुन यस चलचित्रको विशेष मानिएको छ ।

ऊटीमा भइरहेको छायांकनका क्रममा बनाइएको उक्त भिडियोले पुरानो टोलीलाई फेरि एकसाथ देखाएपछि दर्शकहरूमा उत्साह थपिएको छ । भिडियोमा पुरानो चलचित्रको चर्चित धुन पनि राखिएको छ, जसले दर्शकलाई अघिल्ला भागहरूको सम्झना गराएको छ ।

अजयले भिडियोसँगै यसपटक सवारी ठूलो हुने र मनोरञ्जन त्योभन्दा पनि धेरै हुने सन्देश दिएका छन्। यसले नयाँ भाग अझ ठूलो स्तरमा आउने संकेत दिएको मानिएको छ ।

यसअघि निर्देशक रोहित शेट्टीले मार्च १४ मा आफ्नो जन्मदिनको अवसरमा चलचित्रको पाँचौँ भागको औपचारिक घोषणा गरेका थिए। उनले सार्वजनिक गरेको झलकमार्फत छायांकन सुरु भएको जानकारी दिएका थिए।

उक्त झलकमा अरशद वारसी, तुषार कपूर, श्रेयस तलपडे र कुणाल खेमुको उपस्थिती पुष्टि गरिएको थियो। पहिलो चलचित्रमा रहेका शर्मन जोशीको पनि पुनरागमन भएको छ । साथै अक्षय कुमारको नयाँ अवतारले पनि दर्शकको ध्यान तानेको छ ।

सन् २००६ मा सुरु भएको यो हिन्दी चलचित्र क्षेत्रको सफल हास्य श्रृंखलामध्ये एक मानिन्छ। पारिवारिक मनोरञ्जन, हास्य र कलाकारहरूको उत्कृष्ट तालमेलका कारण यसका सबै भागले राम्रो दर्शक समर्थन पाएका छन् ।

अहिले ऊटीमा छायांकन जारी रहेकाले यस चलचित्रप्रति दर्शकको प्रतीक्षा अझ बढ्दै गएको छ ।