मन्त्री छान्ने छलफलमा रास्वपा नेताहरु, शपथअघि प्रधानमन्त्री नियुक्त हुदै बालेन

सेतोमसी
चैत्र १३, २०८२ शुक्रवार

मन्त्री छान्ने छलफलमा रास्वपा नेताहरु, शपथअघि प्रधानमन्त्री नियुक्त हुदै बालेन

अ +
अ
अ -

काठमाडौँ । राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले आज प्रधानमन्त्रीमा नियुक्त हुने भएका छन् ।

राष्ट्रपति रामचन्द पौडेलले शपथअघि नै बालेनलाई प्रधानमन्त्री नियुक्ति गर्ने तयारी गरेका छन् । आज दिउँसो १२:३४ मा शपथ लिने समय तय भएको छ भने त्यसअघि प्रधानमन्त्रीको नियुक्ति हुने छ ।

प्रधानमन्त्रीसँगै आज मन्त्रीहरूले पनि आजै शपथ लिने तयारी गरिएको छ । बालेन शाह र सभापति रवि लामिछानेसहितका नेताहरु मन्त्रीको नाम टुंगाउने छलफलमा रहेका छन् । शुक्रबार बिहानदेखिनै बालेनसहितका नेताहरु छलफलमा जुटेका छन् ।

अहिलेसम्म प्राप्त जानकारी अनुसार १६ सदस्यीय मन्त्रिपरिषद बनाउने बताइएको छ । बालेनले मन्त्रिपरिषदमा महिला र मधेशीलाई प्राथमिकता दिएर सहभागी गराउने गरी मन्त्री छनौट गर्न लागेको बुझिएको छ ।

अहिलेसम्म डा. स्वर्णिम वाग्ले, डिपी अर्याल, सोबिता गौतम, सुनिल लम्साल, सस्मित पोख्रेललगायतको नाम मन्त्रीमा चर्चामा रहेको छ । त्यस्तै केहि मन्त्रालय मर्ज गरिने तयारी समेत भएको छ, जसमा पर्यटन र उद्योग, भौतिक पूर्वाधार र सहरी विकास मन्त्रालय एक बनाउने गरी छलफल भएको छ । त्यस्तै मन्त्री बन्ने दौडमा डा. अमरेश कुमार सिंह, सुदन गुरुङ, इन्दिरा राना मगर, प्रतिभा रावल, सागर ढकाललगायतको नाम पनि चर्चामा रहेको छ ।