हेटौडा । सडक डिभिजनले हेटौडा बजार क्षेत्रमा डोजर चलाएपछि यसको असर राजनीतिमा पनि परेको छ । शनिवार बिहान हेटौडाको बजार क्षेत्रमा डोजर चलेपछि कुलमान घिसिङ संरक्षकत्वको उज्यालो नेपाल पार्टीकी केन्द्रीय सदस्य विद्या श्रेष्ठले केन्द्रीय सदस्यबाट राजीनामा दिएकी छिन् ।

श्रेष्ठले सामाजिक सजालमार्फत राजीनामाको घोषणा गरेकी हुन् । उनले भनेकी छन्- 'म आजदेखि उज्यालो नेपाल पार्टीको केन्द्रीय सदस्यबाट राजीनामाको धोषणा गर्दछु । अरु अभियन्ता साथीहरू के गर्नुहुन्छ ? मेरो नैतिकताले दिएन । म हेटौँडा पीडितको साथ छु ।'

कुलमान सरकारमा भौतिक पूर्वाधार, शहरी विकास र ऊर्जा, जलस्रोत तथा सिँचाइमन्त्री छन् र उनकै निर्देशनमा सर्वोच्चको आदेशको अवज्ञा गर्दै शनिबार बिहान अध्यारैमा हेटौँडाको बजार क्षेत्रका संरचनामा डोजर चलाइएको बताइएको छ ।

त्यस्तै राप्रपा नेपालका अध्यक्ष कमल थापाले हेटौडामा सर्वोच्चको आदेश विपरित सडक विस्तार गर्न संरचनामा डोजर चलाएकोप्रति कानुनी राज्यको नाङ्गो उपहास भएको टिप्पणी गरेका छन् ।  अध्यक्ष थापाले सर्वोच्च अदालतले 'सडक विस्तार तत्काल रोक्नु' भन्ने आदेश दिँदादिँदै पनि पूर्वप्रधानन्यायाधीशको नेतृत्वमा बनेको सरकार जनताको निजी सम्पत्तिमाथि आक्रमण गरेको आरोप लगाएका हुन् ।  उनले बाइपासको विकल्प छँदाछँदै र राजमार्ग बन्नुअगावै बसेको बस्ती अनि जनताको वैध स्वामित्व रहेको निजी सम्पत्तिमाथि मुआब्जा नदिई जबर्जस्ती कब्जा गर्ने कार्य जघन्य अपराध भएको समेत बताएका छन् ।

हेटौंडा उपमहानगर क्षेत्रभित्र पर्ने राष्ट्रिय राजमार्गको सडक सीमा केन्द्र रेखादेखि २५–२५ गजभित्र बनेका स्थायी तथा अस्थायी प्रकृतिका घरटहरा, संरचना हटाउन दिएको १५ दिने अल्टिमेटम दिदै सडक डिभिजनले मंसिर २० देखि सडक विस्तारको काम शुरु गर्ने र सीमाभित्रका संरचना हटाउने बताएको थियो । शुक्रबार मात्र सर्वोच्च अदालतले सडक विस्तार कार्य रोक्न अल्पकालीन अन्तरिम आदेश दिएको थियो ।