युएईमा मनाइयो गणतन्त्र दिवस

रेशम अधिकारी
जेठ १६, २०८२ शुक्रवार

अ +
अ
अ -

यूएई । नेपाली राजदूतावास, अबुधाबीले गणतन्त्र दिवस २०८२ को अवसरमा शहीदहरूलाई श्रद्धाञ्जली अर्पण गर्दै गणतन्त्र दिवस मनाएको छ ।

कार्यक्रममा नव नियुक्त राजदूत जनकबहादुर क्षेत्री, दुबईस्थित नेपाली महावाणिज्यदूतावासका महावाणिज्यदूत हरिप्रसाद ओझारी, राजदूतावास तथा महावाणिज्यदूतावासका कूटनीतिक कर्मचारी, नेपाली संघ संस्था तथा व्यवसायिक समुदायका एक सय बढि प्रतिनिधिहरूको उपस्थिति थियो ।

कार्यक्रम बोल्दै राजदूत क्षेत्रीले गणतन्त्र नेपालको ऐतिहासिक पृष्ठभूमि र यसको उपलब्धिहरूको चर्चा गर्दै, विदेशमा रहेका नेपालीहरूलाई आफ्नो अनुभव र सिपमार्फत मातृभूमिको समृद्धिका लागि योगदान गर्न आग्रह गरे । उनले लोकतान्त्रिक मूल्य, सुशासन, दीगो विकास र स्थायित्वमा सबैको जिम्मेवारी रहने स्पष्ट पारे ।

महावाणिज्यदूत ओझारीले गणतन्त्रले नेपाली जनतामा जगाएको आत्मविश्वास, अधिकार र समृद्धिको सम्भावनाको चर्चा गर्दै विदेशस्थित नेपाली समुदायलाई राष्ट्रिय हितमा संलग्न हुन आग्रह गरे । उनले दुबईमा महावाणिज्यदूतावासको स्थापना गर्ने नेपाल सरकारको निर्णयप्रति आभार व्यक्त गर्दै सेवा प्रभावकारी रूपमा सञ्चालन हुने बताए ।

कार्यक्रममा एनआरएनए एनसीसी युएई, पत्रकार महासंघ लगायत विभिन्न संघ संस्थाका प्रतिनिधिहरूले शुभकामना व्यक्त गरेका थिए ।