ललितपुर । ललितपुर महानगरपालिकाका प्रमुख चिरिबाबु महर्जनले विकास निर्माणलाई 'रेगुलर बिजनेस' को रूपमा परिभाषित गर्दै यसको प्रवाह रोक्न कुनै शक्ति सक्षम नरहेको टिप्पणी गरेका छन् । २०७२ को विनाशकारी भूकम्पको स्मरणमा महानगरपालिकाले आयोजना गरेको कार्यक्रममा बोल्दै प्रमुख महर्जनले विपद्को बेलामा नगरले देखाएको चुस्त प्रतिक्रिया र संरचनागत तयारीलाई देशमै उदाहरणीय भएको बताए ।

‘विकास भनेको रुक्ने कुरा होइन,’ प्रमुख महर्जनले भने, ‘यो त भइ नै रहन्छ । कसैले रोकेर रोकिँदैन । तर जब आपत् विपद् आइपर्छ, त्यस्तो अवस्थामा नगरवासीको सेवा गर्न सक्ने क्षमताको परीक्षा हुन्छ ।’

उनले ललितपुर महानगरपालिकाले विपद् व्यवस्थापनमा एकै छानामुनि सबै संयन्त्र खडा गरेको दाबी गर्दै भने, ‘नेपालका २ सय ९३ वटा स्थानीय तह (महानगर, उपमहानगर र नगरपालिका) मध्ये विपद् व्यवस्थापनमा ललितपुर अब्बल छौं भन्ने दाबी म सधैं गर्दै आएको छु । कुनैपनि घटना भएलगत्तै हामी उद्धारका लागि चुस्तदुरुस्त रूपमा अघि सर्छौं ।’

कार्यक्रममा महर्जनले ललितपुर महानगरपालिकाले सेवा प्रवाहमा समेत गतिशीलता देखाएको उल्लेख गर्दै ट्राफिक जाममा नअल्झिएको अवस्थामा ४ मिनेटभित्र सेवा दिनसक्ने क्षमतामा महानगर पुगेको दाबी गरे ।

महानगरको विकास यात्रालाई उनले निरन्तरता पाइरहेको बताउँदै भने, ‘हामीले योजना बनाएर अगाडि बढाउँछौं, व्यवस्थित र दिगो विकासको लक्ष्यसहित हामीसँग योजना छ, संयन्त्र छ र प्रतिबद्धता पनि छ ।’

२०७२ को भूकम्पबाट सिकेको पाठलाई ललितपुर महानगरपालिकाले संस्थागत विकासको अवसरमा रूपान्तरण गरेको महर्जनको दाबी थियो । भूकम्पको पीडा अझै स्मृतिमा जीवित रहे पनि, त्यसपछि तयार गरिएका संरचना, तयारी र कार्यशैलीले ललितपुरलाई आपत् व्यवस्थापनमा अग्रपंक्तिमा पुर्‍याएको उनले बताए ।