रेशम अधिकारी, युएई । अबुधाबीमा सम्पन्न विश्व स्वास्थ्य सप्ताह–२०८२ मा नेपालले सहभागिता जनाएको छ। कार्यक्रममा सहभागी हुन नेपाली प्रतिनिधिमण्डलको नेतृत्व गर्दै अबुधाबी पुगेका स्वास्थ्य तथा जनसंख्या मन्त्री प्रदिप  पौडेलले विभिन्न अन्तर्राष्ट्रिय फोरमहरूमा नेपालको स्वास्थ्य क्षेत्रका अनुभव, चुनौती र सम्भावनाबारे प्रकाश पारे।

कार्यक्रमको अवसरमा मन्त्री पौडेलले संयुक्त अरब इमिरेट्स सरकारका स्वास्थ्य विभागका अध्यक्ष मन्सुर इब्राहिम अल मन्सुरीसँग भेटवार्ता गरेका छन । उक्त भेटमा नेपाल र संयुक्त अरब इमिरेट्सबीच स्वास्थ्य पूर्वाधार विकास, डिजिटल प्रविधिको उपयोग, स्वास्थ्य बीमा प्रणालीको सुदृढीकरण, मिर्गौला डायलासिस सेवा विस्तार र अङ्ग प्रत्यारोपण जस्ता क्षेत्रमा सहकार्य गर्न सकिने विषयमा गहन छलफल भएको जनाइएको छ।

नेपालले यसपटक विश्व स्वास्थ्य सप्ताहअन्तर्गत आयोजना गरिएको प्रदर्शनीमा राष्ट्रिय स्वास्थ्य स्टलमार्फत आफ्ना नीति, उपलब्धि र आगामी योजनाहरू प्रस्तुत गरेको थियो। स्वास्थ्य मन्त्री पौडेलले उक्त कार्यक्रममा सहभागिता जनाउँदै नेपालले पछिल्लो समय स्वास्थ्य क्षेत्रको सुधारतर्फ लिएको कदमबारे जानकारी गराएका थिए।

कार्यक्रममा विश्वभरबाट करिब १९० भन्दा बढी देशका प्रतिनिधिहरूको उपस्थिति रहेको थियो। नेपालले पहिलोपटक यति ठूलो उपस्थितिमा सहभागिता जनाउनु निकै सकारात्मक पहल भएको बताउँदै मन्त्री पौडेलले स्वास्थ्य कूटनीतिका माध्यमबाट नेपाललाई अन्तर्राष्ट्रिय साझेदारीको केन्द्र बनाउने लक्ष्य रहेको उल्लेख गरे।

यसै क्रममा मन्त्री पौडेलले यही वैशाख ७ गते अबुधाबीमै आयोजना हुने नेपाल महोत्सव–२०८२ मा प्रमुख अतिथि भएर सहभागी हुने कार्यक्रम रहेको दूतावासले जनाएको छ। महोत्सवमार्फत नेपाल र प्रवासमा रहेका नेपाली समुदायबीचको सम्बन्ध थप सुदृढ हुने विश्वास लिइएको छ।