मगर समुदायको भूमे पर्व सुरू, मुख्यमन्त्री महराले दिए शुभकामना

सेतोमसी
आषाढ १, २०८१ शनिवार

मगर समुदायको भूमे पर्व सुरू, मुख्यमन्त्री महराले दिए शुभकामना

फाइल फोटो

अ +
अ
अ -

दाङ । मगर समुदायले परम्परादेखि मनाउँदै आएको भूमे पर्व (भुम्या पर्व) सुरू भएको छ । असार १ गतेदेखि हप्ता दिनसम्म मनाइने यो पर्व परापूर्वकालदेखि प्रकृतिपूजक मगरहरूले मनाउंदै आएका छन् ।

मानवीय क्षति नहोस् र प्राकृतिक विपत्ति नआओस् भनी भूमि पूजा (प्रकृतिको पूजा) गरि भूमे पर्वको शुरुवात गरेको पाइन्छ । अठार मगरात क्षेत्रमा बसोवास गर्ने मगरहरूले हर्षोल्लासका साथ हरेक वर्ष भूमे पर्व मनाउने गर्छन् ।

भुमेपर्वको अवसरमा लुम्बिनी प्रदेशका मुख्यमन्त्री जोखबहादुर महराले शुभकामना सन्देश जारी गरेका छन् । शुभकामना सन्देशमा मुख्यमन्त्री महराले भूमे पर्वले सबै नेपालीहरूमा सकारात्मक सोंचको विकास गरि भ्रातृत्व, एकता, सदभाव र मेलमिलापको वातावरण सृजना गरि देश निर्माणमा टेवा पुराउने विश्वास लिएको जनाएका छन् ।

"संघीय लोकतान्त्रिक गणतन्त्र नेपालको संविधानले सबै जातजाति, भाषाभाषी, धर्म, संस्कृति तथा समुदायको उत्थान र विकासमा जोड दिएको छ ।" सन्देशमा भनिएको छ, "सन्तुलित विकासको अवधारणामा लुम्बिनी प्रदेशवासीहरुको सुखद जीवनस्तर बनाउन प्रदेश सरकारले लिएको “समृद्ध लुम्बिनी, आत्मनिर्भर प्रदेश” को नारालाई साकार पार्न प्रतिवद्ध छौँ ।"