काठमाडौ । आइसिसी लिग-टु अन्तर्गत त्रिकोणात्मक एकदिवसीय क्रीकेटका अन्तिम शृङ्खलाका खेल आज बाट नेपालमा सुरु हुंदैछन । नेपालले पपुवान्युगिनी (पिएनजी) र यूएईसँग आफ्नो घरेलु मैदानमा अन्तिम सिरिज खेल्न लागेको हो ।

कीर्तिपुरस्थित त्रिभुवन विश्वविद्यालयको खेल मैदानमा हुने पहिलो खेलमा आज पपुवा न्युगिनी (पिएनजी)ले घरेलु टोली नेपालको सामना गर्दै छ । फागुन २८ मा  नेपालले यूएईसँग दोस्रो खेल खेल्नेछ । 
त्यस्तै फागुन २९ मा पपुवान्युगिनीसँग नेपालले पुनः खेल्नेछ । विश्वकप लिग टुको अन्तिम खेल नेपालले चैत २ मा फेरी यूएईसँग खेल्नेछ ।

गत मंगलबार नै नेपाल क्रिकेट संघ क्यानले आजबाट नेपालमा हुने आइसिसी लिग टु अन्तर्गत यूएई र पपुवान्युगिनी (पिएनजी)विरुद्धको खेलका लागि रोहित पौडेलको कप्तानीमा क्रिकेट टिमको घोषणा गरिसकेको छ ।

क्यानले पौडेलको कप्तानीमा टिम कुशल भुर्तेल, आशिप शेख, ज्ञानेन्द्र मल्ल, दिपेन्द्रसिंह ऐरी, सन्दीप लामिछाने, करण केसी, प्रतिस जिसी, कुशल मल्ल, आरिफ शेख, सोमपाल कामी, गुलसन झा, भीम सार्की र ललित राजवंशी छन् ।

गत सोमबार नेपालले युएईमा घरेलु टोली माथी सानदार जित निकालेको थियो । उक्त जितसँगै नेपाल अङ्कतालिकाको पाँचौं स्थानमा उक्लिएको छ भने युएई छैठौं स्थानमा झरेको छ । नेपालको ३२ खेलमा ३२ अङ्क भएको छ।

उता स्कटल्यान्ड ५० अङ्क सहित शीर्षस्थानमा छ। दोस्रो स्थानमा रहेको ओमनको ४४, तेस्रो स्थानमा रहेको नामिबियाको ३९ र चौथो स्थानमा रहेको अमेरिकाको ३५ अङ्क छ ।

अब नेपालले विश्वकप छनोट प्रतियोगितामा स्थान बनाउन यो श्रृंखलाका सबै चार खेल जित्नुपर्नेछ भने एकदिवसीय मान्यता पनि कायमै रहनेछ । यदि नेपाल अङ्कतालिकाको शीर्ष तीनमा पर्न नसके विश्वकप छनोटका लागि क्वालिफायर प्लेअफ खेल्नुपर्ने हुन्छ । जसबाट शीर्ष दुई टोलीले विश्वकप छनोट खेल्न पाउनेछन् ।

त्यस्तै लिग–२ मा शीर्ष पाँचमा पर्न नसके नेपालले एकदिवसीय मान्यता जोगाउन प्लेअफ क्वालिफायरमा शीर्ष चारमा पर्नुपर्ने हुन्छ । शीर्ष पाँचमा पर्न अबका ४ खेलमध्ये २ खेल जिते पुग्नेछ ।