देवदह । देवदहमा युवासँग हामी कार्यक्रम सम्पन्न भएको छ । आइतबार समृद्ध समुदाय विकास केन्द्र रुपन्देहीको आयोजना, स्कुल लाइफ इन नेपाल डेनमार्कको साझेदारी तथा देवदह नगरपालिकाको समन्वयमा युवासँग हामी सरोकारवालाहरुसँग अन्तरक्रिया कार्यक्रम सम्पन्न भएको हो ।

कार्यक्रमको औचित्य तथा परियोजनाको अवधारणाबारे बोल्दै समृद्ध समुदाय विकास केन्द्र रुपन्देहीका परियोजना प्रमुख युवराज चापागाईंले युवाहरुलाई उद्यमशील बनाउँदै जिम्मेवार नागरिकको रुपमा स्थापित गर्नका लागि आँफुहरुले काम गरिरहेको बताए । उनले युवाहरुमा रहेका हरेक समस्यका क्षेत्रमा काम गर्दै युवालाई अगाडि बढाउने परियोजनाको मुख्य कार्य रहेको बताए । विभिन्न संघ संस्था तथा विद्यालयहरुसँगको सहकार्यमा युवा लक्षित तालिम तथा युवा विकासको क्षेत्रमा काम गर्ने परियोजनाको रणनीति रहेको जानकारी दिए ।

कार्यक्रममा जिल्ला समन्वय समिति रुपन्देहीका अध्यक्ष उमाकान्त चपाईँ, देवदह नगर प्रमुख ध्रुव प्रसाद खरेल, संस्थाका संरक्षक एवं देवदहका पुर्व नगर प्रमुख हिरा बहादुर खत्री, नगरका प्रवक्ता एवं वडा नम्बर ५ का अध्यक्ष गणेश डुम्रे, लुम्बिनी युवा परिषद नेपालका उपाध्यक्ष गोविन्द केसी लगायतले बोल्दै युवा शसक्तिकरण आजको आवस्यकता रहेको औँल्याउनुभयो । युवाहरु जिम्मेवार र उद्यमशील बने मात्र समाज समृद्ध हुने उहाँहरुको भनाई रहेको थियो ।

कार्यक्रममा युवा तथा उद्यमसँग सम्बन्धित उर्जाका आशाहरु शिर्षकको नाटक प्रस्तुत गरिएको थियो ।

देवदहका जनप्रतिनिधिहरु, टोल बिकास संस्थाका पदाधिकारीहरु, युवा क्लवका प्रतिनिधिहरु, उद्यमी व्यवसायी, युवा लगायतको सहभागीता रहेको कार्यक्रममा हरेक क्षेत्रका प्रतिनिधिहरुले आ-आफ्नो क्षेत्रमा युवाहरुको संलग्नता, समस्या तथा योजनाका बिषयमा आयोजकले राखेका प्रश्नहरुको विश्लेषणात्मक जवाफ प्रस्तुत गरेका थिए । 

कार्यक्रम संस्थाका अध्यक्ष ठाकुर घिमिरेको अध्यक्षता, मनकला पाण्डेयको स्वागत तथा आविस्कार परजुली र राहुल सापकोटाको सञ्चालनमा सम्पन्न भएको थियो ।