अमेरिकामा ममता काफ्लेको हत्या अभियोगमा पति नरेश भट्ट दोषी ठहर

सेतोमसी
कार्तिक २६, २०८३ बुधवार

अमेरिकामा ममता काफ्लेको हत्या अभियोगमा पति नरेश भट्ट दोषी ठहर

अ +
अ
अ -

काठमाडौं । नेपाली मूलकी ममता काफ्ले भट्टको हत्या अभियोगमा उनका पति नरेश भट्ट अमेरिकाको भर्जिनियास्थित अदालतबाट दोषी ठहर भएका छन् ।

प्रिन्स विलियम काउन्टी अदालतको जुरीले मंगलबार नरेशलाई प्रथम श्रेणीको हत्या, शव लुकाउने तथा नष्ट गर्ने र मृत शरीर विकृत बनाउने अभियोगमा दोषी ठहर गरेको हो । करिब पाँच घण्टाको छलफलपछि जुरीले यस्तो फैसला सुनाएको थियो ।

फैसलापछि अदालतले सजाय निर्धारण नभएसम्म नरेशलाई धरौटीमा रिहा गर्न अस्वीकार गरेको छ । उनको सजाय आगामी सन् २०२७ मार्चमा निर्धारण हुने तय भएको छ ।

मुद्दाको सुनुवाइका क्रममा अभियोजन पक्षले विषविज्ञान विशेषज्ञ, नरेशका पूर्वसहकर्मी तथा ममताका साथी र सहकर्मीसहितका साक्षी प्रस्तुत गरेको थियो । अभियोजन पक्षले करिब १०० जना साक्षी र झन्डै ५०० वटा प्रमाण अदालतमा पेस गरेको थियो ।

ममताकी साथी सुनिता बस्नेत थापाले बयानका क्रममा ममता आत्महत्या गर्ने स्वभावकी नभएको र उनले कहिल्यै त्यस्तो कुरा नगरेको बताएकी थिइन् । उनले ममताको अनुहारमा चोटसमेत देखेको बयान दिएकी थिइन् ।

नरेशले भने ममताले आत्महत्या गरेको दाबी गर्दै आएका थिए । प्रतिरक्षा पक्षले पनि अभियोजन पक्षले आरोप पुष्टि गर्न नसकेको जिकिर गरेको थियो ।

ममता सन् २०२४ मा बेपत्ता भएपछि घटनाको अनुसन्धान सुरु भएको थियो । त्यसपछि प्रहरीले नरेशमाथि पत्नीको हत्या गरी शव लुकाएको लगायतका अभियोग लगाएको थियो ।