काठमाडौं । अमेरिकी प्रविधि कम्पनी एनभिडियाले प्रमुख कार्यकारी अधिकृत जेन्सेन हुआङको चिनियाँ जासुससँग प्रेम सम्बन्ध रहेको आरोपबारे स्वतन्त्र अनुसन्धान गर्ने भएको छ ।
कम्पनीले अनुसन्धानका लागि अमेरिकाको प्रतिष्ठित ल फर्म वाच्टेल, लिप्टन, रोजेन एन्ड काट्जलाई नियुक्त गरेको छ । अनुसन्धानको नेतृत्व पूर्वअमेरिकी सरकारी वकिल जुन किमले गर्नेछन् । यस विषयमा अमेरिकी सङ्घीय अनुसन्धान निकायले पनि छुट्टै अनुसन्धान गरिरहेको छ ।
हुआङले विवाहबाहिर प्रेम सम्बन्ध रहेको स्वीकार गरेका छन् । एलिस हुआङ नामकी महिलालाई चीनका लागि जासुसी गरेको आरोप लागेको छ । उनी सिङ्गापुरको मेगास्पिड नामक कम्पनीमा कार्यकारी पदमा थिइन् । उक्त कम्पनीले एनभिडियाका चिप चीन पुर्याउन सहयोग गरेको आशङ्का गरिएको थियो । तर एनभिडियाले यसअघि नै उक्त आरोपको अनुसन्धान गरी खण्डन गरिएको जनाएको थियो ।
यस प्रकरण सार्वजनिक भएपछि एनभिडियाको बजार मूल्यमा ठूलो गिरावट आएको छ । शुक्रबारयता कम्पनीको बजार पुँजीकरणबाट करिब पाँच खर्ब अमेरिकी डलर घटेको छ । अमेरिकी संसद्को विदेश मामिला समितिले पनि हुआङलाई अर्को साता बन्द बैठकमा उपस्थित भएर स्पष्टीकरण दिन आग्रह गरेको छ ।
एनभिडियाको सञ्चालक समितिले भने कम्पनीको गोप्य सूचना वा राष्ट्रिय सुरक्षामा असर परेको विश्वास गर्ने कुनै आधार नरहेको जनाएको छ । अमेरिकी राष्ट्रपति डोनाल्ड ट्रम्पले पनि हुआङसँग कुराकानी गरेको र उनले ती महिला जासुस भएको आफूलाई थाहा नभएको बताएको उल्लेख गरेका छन् ।
.gif)
सेतोमसी मिडिया नेटवर्क प्रा. लि.
देवदह-७, रुपन्देही, लुम्बिनी प्रदेश, नेपाल
फोन नं. : +977-71-577088
मोबाइल नं. : +977-9857029586
+977-9857057732
+9779857056296
इ-मेल : setomasimedia@gmail.com
सूचना तथा प्रसारण विभाग दर्ता नं : २२४८/०७७-७८
प्रधान सम्पादक : विष्णु प्रसाद पोखरेल
प्रबन्ध सम्पादक : पूर्णप्रसाद पौडेल (पवन पौडेल)
सम्पादक : टक बहादुर सुनार (टंक सुनार)
Copyright © All right reserved to setomasi.com
Site By: SobizTrend Technology