विद्यालयका सहयोगी कर्मचारीलाई उपदानको व्यवस्था गर्न सरोकारवालाको माग

सेतोमसी
आश्विन २७, २०८३ मंगलवार

विद्यालयका सहयोगी कर्मचारीलाई उपदानको व्यवस्था गर्न सरोकारवालाको माग

अ +
अ
अ -

देवदह । विद्यालयमा लामो समय सेवा गरेका सहयोगी कर्मचारीलाई राज्यले उपेक्षा गरेको भन्दै सरोकारवालाहरूले उनीहरूको सेवा सुरक्षाका लागि पेन्सन तथा उपदानको व्यवस्था गर्न माग गरेका छन् ।

रूपन्देहीको देवदहस्थित महामाया भवानी माध्यमिक विद्यालयमा आयोजित शिक्षक तथा कर्मचारी बिदाइ एवं विजयादशमी, शुभदीपावली र छठ पर्व २०८३ को शुभकामना आदानप्रदान कार्यक्रममा बोल्ने वक्ताहरूले विद्यालय सहयोगी कर्मचारीको योगदानको उचित मूल्याङ्कन हुन नसकेको बताएका हुन् ।

विद्यालयमा तीन दशकसम्म कार्यालय सहयोगीका रूपमा सेवा गरेका कुलबहादुर खवासको बिदाइ कार्यक्रममा वक्ताहरूले लामो समय विद्यालयको सेवामा जीवन बिताएका कर्मचारी अवकाश हुँदा रित्तो हात फर्कनुपर्ने अवस्था दुःखद भएको उल्लेख गरे । उनीहरूले विद्यालय सहयोगी कर्मचारीको योगदानको कदर गर्दै राज्यले पेन्सन तथा उपदानको व्यवस्था गर्नुपर्नेमा जोड दिए ।

बिदाइका क्रममा खवासले विद्यालयप्रति आफ्नो अमूल्य जीवन र योगदान समर्पित गर्दा पनि संघीय सरकारले आफूहरूजस्ता कर्मचारीलाई उपेक्षा गरेको गुनासो गरे । लामो समय सेवा गरेका कर्मचारीको भविष्य सुरक्षित गर्न राज्यले आवश्यक नीति तथा व्यवस्था गर्नुपर्ने उनको भनाइ थियो ।

कार्यक्रममा देवदह नगरपालिकाका प्रमुख ध्रुवप्रसाद खरेलले स्थानीय सरकारले अस्थायी कर्मचारीका मागलाई सम्बोधन गर्ने प्रतिबद्धता व्यक्त गरे ।

कार्यक्रममा देवदह नगरपालिका वडा नं. ४ का वडाध्यक्ष दमननाथ रेग्मी, विद्यालयका प्रधानाध्यापक ऋषिश्वर अर्याल, पूर्व अध्यक्ष छविलाल घर्ती जिसी, पूर्वविद्यार्थी समाजका अध्यक्ष झविन्द्रप्रसाद पाण्डेय, पूर्वप्रधानाध्यापक दिनानाथ अर्याल, पूर्वशिक्षक लीलावल्लभ भट्टराई र दुर्गा पौडेल बोलेका थिए ।