देवदह । काखमा दुई वर्षको छोरो, मनभरी चिन्ता र पीडा बोकेर देवदहकी अमिशा विक सोमबार सेतोमसी कार्यालय पुगिन् । टन्टलापुर घाममा मिडियाको साथ खोज्दै सेतोमसीमा आएकी उनले आफ्नो श्रीमान् हराएकोले खोजी कार्यमा सहयोग गरिदिन अनुरोध गरिन् ।

देवदह नगरपालिका-११ शंकरपुर बस्दै आएका २४ वर्षीय निशान रामदम गत वैशाख २९ गतेदेखि परिवारको सम्पर्कमा छैनन् । २०८१ पौष २ गते बैदेशिक रोजगारीको लागि कोरिया गएका श्रीमान् नेपाल आएपछि सम्पर्क बिहिन हुँदा दुई वर्षको छोरासहित निशानको खोजीमा अमिशा भौतारिरहेकी छन् ।

अमिशाका अनुसार वि.सं. २०८३ वैशाख ५ गते कोरियाबाट फर्किएका निशानलाई उनी र उनका परिवारले काठमाडौं स्थित विमानस्थलमा भेटेको थियो । केहि समय पछि एकदिन घरमा आएपनि बिहेमा जान्छु भनेर निस्किएका निशान त्यसयता न घर फर्किएका छन्, न त परिवारसँग कुनै सम्पर्क नै गरेका छन् । आफन्त, साथीभाइ तथा सम्भावित स्थानहरूमा खोजी गर्दा पनि कुनै जानकारी प्राप्त हुन नसकेपछि अमिशाले वैशाख ३० गते जिल्ला प्रहरी कार्यालय रुपन्देहीमा निवेदन दिएकी थिइन् ।

जिल्ला प्रहरी कार्यालय रुपन्देही अन्तर्गत महिला, बालबालिका तथा ज्येष्ठ नागरिक सेवा केन्द्रले समेत निशानको खोजीका लागि सार्वजनिक सूचना जारी गर्दै सर्वसाधारणसँग सहयोगको अपिल गरेको छ । प्रहरीका अनुसार हालसम्म उनको अवस्था खुल्न सकेको छैन ।

प्रहरीले उपलब्ध गराएको विवरणअनुसार निशान रामदम २४ वर्षका, गहुँगोरो वर्णका र मझौला शरीरका छन् । उनी नेपाली तथा कोरियन भाषा समेत बोल्न सक्ने प्रहरीको विवरणमा उल्लेख छ ।

श्रीमान् हराएपछि परिवार चिन्तित बनेको छ भने अमिशा दिनहुँ उनको सकुशल फिर्तीको प्रतीक्षामा छिन् । ‘छोराले पनि बुबा खोज्छ, कहाँ गए थाहा छैन ।’ उनले भावुक हुँदै खोजीमा सहयोग गरिदिन सबैसँग आग्रह गरिन् ।

निशान रामदमको बारेमा कुनै जानकारी भएमा नजिकको प्रहरी कार्यालय वा निवेदक अमिषा विकको सम्पर्क नम्बर ९७०८५२११३५ मा जानकारी गराउन अमिशाले आग्रह गरेकी छन् ।