अन्तर्राष्ट्रिय

इजरायल र हिजबुल्लाहको एकअर्कामाथि युद्धविराम उल्लंघनको आरोप

एजेन्सी
बैशाख ११, २०८३ शुक्रवार

इजरायल र हिजबुल्लाहको एकअर्कामाथि युद्धविराम उल्लंघनको आरोप

अ +
अ
अ -

काठमाडौँ । इजरायल रक्षा बल र हिजबुल्लाहले एकअर्कामाथि युद्धविराम उल्लंघन गरेको आरोप लगाएका छन् ।

इजरायली सेनाले लेबनानबाट प्रहार गरिएका केही प्रक्षेपास्त्रलाई रोकेको जनाएको छ। श्टुला क्षेत्रमा साइरनसमेत बजाइएको बताइएको छ। हिजबुल्लाहले भने टेलिग्राममार्फत रकेट आक्रमण गरी उक्त क्षेत्रलाई निशाना बनाएको दाबी गरेको छ ।

इजरायली सेनाले सामाजिक सञ्जालमार्फत जारी वक्तव्यमा तीन जनालाई मारिएको जनाएको छ । ती व्यक्तिलाई हिजबुल्लाहसँग सम्बन्धित लडाकु भएको दाबी गरिएको छ । सेनाका अनुसार उनीहरूले इजरायली वायुसेनाको विमानतर्फ क्षेप्यास्त्र प्रहार गर्ने असफल प्रयास गरेका थिए ।

इजरायली सेनाले दक्षिणी लेबनानमा तैनाथ आफ्ना सैनिकमाथि हिजबुल्लाहले दुई फरक घटनामा रकेट प्रहार गरेको पनि जनाएको छ । उसले यी गतिविधिलाई युद्धविराम सम्झौताको खुला उल्लंघन भनेको छ ।

यसअघि बिहीबार साँझ हिजबुल्लाहले उत्तरी इजरायलमा रकेट प्रहार गरेको स्वीकार गर्दै त्यसलाई इजरायलले गरेको युद्धविराम उल्लंघनको जवाफ भएको जनाएको थियो ।

लेबनानको सरकारी राष्ट्रिय समाचार एजेन्सीका अनुसार शुक्रबार बिहान इजरायलले देशको दक्षिणी भागस्थित टायर सहरमा पनि आक्रमण गरेको छ।