समाचार

वीरगञ्जमा कर्फ्यू हटाइयो : निषेधाज्ञा लागू

सेतोमसी
फाल्गुण ११, २०८२ सोमवार

वीरगञ्जमा कर्फ्यू हटाइयो : निषेधाज्ञा लागू

अ +
अ
अ -

पर्सा । पर्साका प्रमुख जिल्ला अधिकारीले वीरगञ्ज महानगर क्षेत्रमा जारी कर्फ्यू आदेश हटाउँदै निश्चित समयका लागि निषेधाज्ञा लागू गरिएको जानकारी दिएका छन् ।

जिल्ला सुरक्षा समितिको निर्णयअनुसार स्थानीय प्रशासन ऐन, २०२८ को दफा ६ (क) बमोजिम मिति २०८२ फागुन ११ गते बिहान ९:४५ बजेदेखि अर्को आदेश नभएसम्म लागू रहने गरी वीरगञ्ज महानगरपालिका का केही स्थानमा कर्फ्यू आदेश जारी गरिएको थियो ।

तर समग्र शान्ति-सुरक्षाको अवस्था क्रमशः सुधारोन्मुख देखिएको तथा सर्वपक्षीय बैठकको निर्णयका आधारमा सो कर्फ्यू आदेशलाई निरन्तरता दिन आवश्यक नदेखिएकाले आजै साँझ ४:३० बजेदेखि लागू हुने गरी कर्फ्यू हटाइएको प्रमुख जिल्ला अधिकारी भोला दाहालले जनाएका छन्।

यद्यपि अवस्था पूर्ण रूपमा सामान्य भइनसकेको भन्दै महानगरका तोकिएका क्षेत्रहरूमा बेलुकी ६ बजेदेखि भोलि बिहान ८ बजेसम्म कुनै पनि प्रकारका भेला, सभा, जुलुस तथा प्रदर्शन गर्न नपाइने गरी स्थानीय प्रशासन ऐन, २०२८ को दफा ६ (३क) बमोजिम निषेधाज्ञा जारी गरिएको छ ।

निषेधाज्ञा पूर्वतर्फ बाइपास रोड, पश्चिमतर्फ रानीघाट पुल उत्तरतर्फ पावर हाउस चोक र दक्षिणतर्फ घण्टाघर चोकसम्म रहने प्रशासनले जनाएको छ । प्रशासनले आदेश उल्लंघन गर्ने जो-कोहीलाई नियन्त्रणमा लिएर कानुनबमोजिम कारबाही गरिने चेतावनी दिएको छ । जिल्ला प्रशासन कार्यालयले सर्वसाधारणलाई संयमित र जिम्मेवार व्यवहार गर्न आग्रह गरेको छ ।