समाज

‘मेल्भिन जोन्स’ सप्ताहमा लायन्स क्लव देवदहद्धारा विद्यालयलाई पानी टंकी सहयोग

सेतोमसी
पौष २४, २०८२ बिहिवार

‘मेल्भिन जोन्स’ सप्ताहमा लायन्स क्लव देवदहद्धारा विद्यालयलाई पानी टंकी सहयोग

अ +
अ
अ -

देवदह । सामाजिक सेवामा सक्रिय लायन्स क्लव अफ देवदहले १४७औँ ‘मेल्भिन जोन्स’ सप्ताहको अवसरमा विद्यालयमा पानी ट्याङ्की वितरण गरेको छ ।

लायन्स क्लवका जन्मदाता जोन्सको स्मरणमा सामाजिक उत्तरदायित्व अन्तर्गत देवदह नगरपालिका वडा नं ११ स्थित जनता आधारभूत विद्यालयमा पानी ट्यांकी तथा हात धुने बेसिन वितरण गरेको हो ।

विद्यालयमा अध्ययनरत विद्यार्थीहरूलाई स्वास्थ्य जागरण गराउने र सरसफाइप्रति सचेत बनाउने उद्देश्यले उक्त सामग्री हस्तान्तरण गरिएको क्लवका अध्यक्ष सिर्जना ओलीले जानकारी दिइन् ।

‘हस्तान्तरणसँगै विद्यार्थीहरूमा नियमित रूपमा हात धुने बानीको विकास हुने हामीले विश्वास लिएका छौं ।’ अध्यक्ष ओलीले भनिन्, ‘यसले संक्रमणजन्य रोगहरूको जोखिम न्यूनीकरण गर्न महत्वपूर्ण भूमिका खेल्ने हामीले अपेक्षा गरेका छौं ।’

विद्यालय परिवारले क्लबले गरेको सहयोग प्रति आभार व्यक्त गर्दै यस सहयोगले विद्यालयको शैक्षिक वातावरण तथा विद्यार्थीहरूको स्वास्थ्यमा सकारात्मक प्रभाव पर्ने विश्वास व्यक्त गरे ।

विद्यालय व्यवस्थापन समिति अध्यक्ष राजेश मल्लाह लायन्स क्वल ३२५ पि का प्रथम उपाध्यक्ष सन्दिप कसौधन लगाएतको उपस्थिति रहेको कार्यक्रमको सञ्चालन क्लवका सचिव दिपेश अर्यालले गरेका थिए ।