काँग्रेस पदाधिकारी बैठक बस्दै, स्थानीय निर्वाचन, एमसिसी र सांगठनिक विषयमा छलफल हुने

सेतोमसी
माघ २६, २०७८ बुधवार

काँग्रेस पदाधिकारी बैठक बस्दै, स्थानीय निर्वाचन, एमसिसी र सांगठनिक विषयमा छलफल हुने

फाइल फोटो

अ +
अ
अ -

काठमाडौं । नेपाली काँग्रेसका पदाधिकारीबीच आन्तरिक छलफल हुँदैछ । भोलि बस्ने केन्द्रीय कार्यसम्पादन समितिको बैठकका एजेन्डामाथि बुधबार दिउँसो २ बजे प्रधानमन्त्रीको निवास बालुवाटारमा छलफल हुन लागेको हो, जसमा स्थानीय निर्वाचन, एमसीसी लगायत रहेका छन् ।

मंगलबार सभापति बाहेक पदाधिकारीहरुबीच भ्रातृ तथ शुभेच्छुक संस्था, अधिवेशन हुन बाँकी र स्थानीय तह निर्वाचनको तयारीका विषयमा पार्टी कार्यालय सानेपामा छलफल भएको थियो ।

आज सभापतिको उपस्थितिमा उक्त विषयमाथि थप छलफल हुन लागेको प्रवक्ता प्रकाशशरण महतले जानकारी दिए । उनले भने, ‘हिजोको छलफलमा सभापतिज्यू सहभागी हुनुहुन्थेन । हिजो छलफल भएका विषयको जानकारी गराउन २ बजे हामी बालुवाटार जाँदैछ । त्यसमा थप छलफल हुन्छ ।’

काँग्रेस म्याद सिकाएका भ्रातृ तथा शुभेच्छुक संस्थालाई अधिवेशन उन्मुख गराउने तयारी छ । त्यसका लागि नयाँ कमिटी ल्याउने कि वर्तमान कमिटीलाई अधिवेशन गराउने गरि समय थप्ने भन्नेमा छलफल भइरहेको छ ।

यस्तै अधिवेशन हुन बाँकी १६ जिल्लामा फागुनभित्र अधिवेशन गराउने काँग्रेसको तयारी छ । यता स्थानीय निर्वाचनको तयारीका लागि पार्टी पंक्ति परिचालन गर्ने विषयमा पनि छलफल भइरहेको महतले बताए ।