साहित्य

लघुकथाः बिजुलीको बिल

सेतोमसी
श्रावण ३०, २०८२ शुक्रवार

अ +
अ
अ -

प्रचण्ड गर्मी ! खलखली पसिनाले जीउ लछप्पै देखिन्थ्यो । तराई तातो तावा जस्तै थियो ।
साँघुरा कोठामा क्षमता भन्दा धेरै खाँदिएका थिए कैदीहरु ।
कारागार प्रशासनसँग पङ्खाको माग पटक पटक दोहोर्याएका थिए उनीहरुले ।
तर प्रशासन कानमा तेल हालेर मस्त थियो ।
समाचार सामाजिक सञ्जालमा फैलियो । समाचारले अधिकारकर्मीहरुको निद्राहराम भयो । उनीहरुले आर्थिक सहयोगको आव्हान गरे । अर्थ संकलन राम्रै भयो ।

अनि केही थान पङ्खा किने । कारागारमा लगेर पङ्खा हस्तान्तरण कार्यक्रम राखे ।
प्रमुख अतिथि, अतिथिहरुले कारागार परिसर भरिभराउ भयो । दमदार भाषणहरु भए । फोटा खिचे र खुसियाली मनाए ।
कार्यक्रम सकेर फर्कनै लाग्दा कारागार प्रशासकले सोध्यो "पङ्खा त दिनुभयो, बिजुलीको बिल कसले तिर्छ नि ?"