हायु परिवार

घर बनाइदिने वडाअध्यक्षको प्रतिबद्धता पछि हायु परिवार सिन्धुली फर्कन तयार

सेतोमसी
श्रावण १९, २०८२ सोमवार

घर बनाइदिने वडाअध्यक्षको प्रतिबद्धता पछि हायु परिवार सिन्धुली फर्कन तयार

अ +
अ
अ -

सिन्धुली । पोखरा पुगेका सिन्धुलीको गोलन्जोर गाउँपालिका–६ का उर्मिला हायुको परिवार फर्किन तयार भएको छ । वडाध्यक्ष रविन्द्र श्रेष्ठले हायु परिवार सिन्धुली फर्किन तयार भएको जानकारी दिएका छन् ।

साउन १२ गते सोमबार बिहान स्थानीयले हायु परिवार बेपत्ता भएको खबर जिल्ला प्रहरी कार्यालय सिन्धुलीमा गरेपछि प्रहरीले खोजी गर्दा सोहि दिन राती पोखराको गगनगौँडामा उनीहरुलाई फेला परेको थियो ।

यसअघि वडा अध्यक्ष श्रेष्ठसहितका जनप्रतिनि गगनगौँडा पुगेर उर्मिला हायुको परिवारलाई भेट गरेपनि उनीहरु फर्किन मानेका थिएनन् । वडा अध्यक्षसहितको टोलीले पोखरा जस्तो महँगो ठाउमा बस्न गाह्रो हुने भन्दै स्थानीय र संघीय सांसदले समेत सहयोग गर्ने भएकाले फर्किन आग्रह गरेका थिए । गोलन्जोर गाउँपालिका–६ स्थित छेत्पा नजिक भण्डास विप्पर कटेरीबाट घर अलपत्र छोडेर हायु परिवार पोखरा पुगेको थियो ।

वडा अध्यक्ष श्रेष्ठले छुट्टै स्थानमा घर बनाइदिने र वडाले नै शिक्षा, स्वास्थ्य र रोजगारीको व्यवस्था गर्ने बताएका छन् । हायु परिवारले सो स्थानमा आफुहरुको स्वास्थ्य राम्रो नभएको, बच्चाहरु विरामी भइरहेको, खेतीपातीबाट हुने उब्जनीले तीन महिना पनि खान नपुग्ने अवस्था रहेकोले सो स्थान छोडेको बताएका थिए ।