गर्मी बढेपछि तीन दिनका लागि भैरहवाका विद्यालय बन्द

सेतोमसी
श्रावण ९, २०८२ शुक्रवार

गर्मी बढेपछि तीन दिनका लागि भैरहवाका विद्यालय बन्द

अ +
अ
अ -

सिद्धार्थनगर । अत्यधिक गर्मीको कारण सिद्धार्थनगर नगरपालिका, भैरहवाले नगरभित्रका सबै विद्यालयहरु बन्द गर्ने निर्णय गरेको छ ।

नगरपालिकाले सोमबार एक सूचना जारी गर्दै नगरभित्र सञ्चालनमा रहेका सबै सामुदायिक, संस्थागत तथा धार्मिक विद्यालयहरूलाई यही साउन ११ गतेदेखि १३ गतेसम्म (तीन दिन) ‘गर्मी विदा’ दिने निर्णय गरिएको जनाएको हो ।

विद्यालय तहको शिक्षा ऐन २०२८, शिक्षा नियमावली २०५९ र सम्बन्धित व्यवस्थाहरूको आधारमा उक्त निर्णय गरिएको सूचनामा उल्लेख छ ।

नगर कार्यपालिकाका प्रमुख इसराक अहमद खाँद्वारा हस्ताक्षरित सूचनामा तापक्रम अत्यधिक बढेसँगै बालबालिकाको स्वास्थ्यमा असर पर्न सक्ने भन्दै विद्यालय बन्द गरिएको जनाइएको छ ।

यद्यपि यो विदाले विद्यालयमा सञ्चालित कक्षा ११, १२ को परीक्षा तथा अन्य राष्ट्रियस्तरका परीक्षामा भने कुनै असर नपर्ने जनाइएको छ ।