कृष्ण सेन स्मृति दिवस

२३औं कृष्ण सेन 'इच्छुक' स्मृति दिवस मनाइदै

सेतोमसी
जेठ १३, २०८२ मंगलवार

२३औं कृष्ण सेन 'इच्छुक' स्मृति दिवस मनाइदै

अ +
अ
अ -

काठमाडौं । राज्यद्वारा हत्या गरिएका पत्रकार कृष्ण सेन ‘इच्छुक’को सम्झनामा प्रेस सेन्टर नेपालले मंगलबार देशैभर विविध कार्यक्रम गरेर २३औं सेन स्मृति दिवस मनाउदै छ।

२०५९ जेठ १३ गते जनदिशा दैनिकका प्रधान सम्पादक रहेका बेला प्रहरी नियन्त्रणमा रहेका सेनको हत्या गरिएको थियो। त्यसयता प्रेस सेन्टरले प्रत्येक वर्ष जेठ १३ गतेलाई सेन स्मृति दिवसका रूपमा मनाउँदै आएको छ।

यस वर्षको केन्द्रीय कार्यक्रम काठमाडौंको बिजुलीबजारस्थित कृष्टल पार्टी भेन्यूमा बिहान ११ बजेदेखि आयोजना गरिएको छ। कार्यक्रम दुई चरणमा सञ्चालन हुने छ। पहिलो चरणमा कृष्ण सेन ‘इच्छुक’का जीवनी र योगदानमाथि तयार पारिएको भिडियो सामग्री सार्वजनिक गरिनेछ। दोस्रो चरणमा ‘गणतन्त्र र समाजवादको यात्रा’ तथा ‘कृष्ण सेन ‘इच्छुक’ र जनपक्षीय पत्रकारिता’ विषयमा संवाद कार्यक्रम आयोजना हुने जनाइएको छ।

कार्यक्रममा प्रेस सेन्टर नेपालद्वारा प्रदान गरिँदै आएको पत्रकारिता पुरस्कारको घोषणा पनि गरिनेछ।

संगठनका महासचिव मनोज घर्तीमगरद्वारा जारी प्रेस नोटमा सेन्टरका संस्थापक, पूर्वअध्यक्ष, सल्लाहकार, पूर्वपदाधिकारी, केन्द्रीय सदस्य, उपत्यका तथा प्रतिष्ठानसहित एशोसियट प्रदेश र जिल्लास्तरीय प्रतिनिधिहरूलाई कार्यक्रममा उपस्थित भइदिन आग्रह गरिएको छ।

देशभरका प्रदेश, जिल्ला, शाखा र पालिका समितिहरूले पनि कृष्ण सेनको विचार, जनपक्षीय पत्रकारिता र गणतन्त्रसहितको राजनीतिक परिवर्तनलाई केन्द्रविन्दुमा राख्दै आ–आफ्नो स्थानमा विविध कार्यक्रम गर्ने तयारी गरेका छन्।