काठमाडौं । सरकार र आन्दोलनरत नेपाल शिक्षक महासंघबीच मंगलबार शिक्षा मन्त्रालय र सिंहदरबारमा भएका द्विपक्षीय वार्ता निष्कर्षउन्मुख देखिए पनि औपचारिक सहमति भने भएको छैन । आगामी २१ वैशाखदेखि सुरु हुने कक्षा १२ को परीक्षा सञ्चालन गर्ने विषयमा दुवै पक्ष लचक देखिए पनि, वार्ता अझै टुंगोमा पुगेको छैन ।

वार्ता सकिएपछि सञ्चारकर्मीहरूसँग प्रतिक्रिया दिंदै महासंघकी सहअध्यक्ष नानुमाया पराजुलीले कक्षा १२ को परीक्षा तोकिएकै मितिमा हुने स्पष्ट संकेत दिइन्। उनले विद्यार्थीको भविष्यप्रति महासंघ जिम्मेवार रहेको भन्दै परीक्षा अवरुद्ध नहुने बताइन् ।

मंगलबार रातिसम्म चलेको वार्तामा महासंघले सरकारसमक्ष ९ बुँदे माग प्रस्तुत गरेको बुझिएको छ । वार्तामा सहभागी एक मन्त्रीका अनुसार, ती माग मन्त्रिपरिषदबाट पारित भए महासंघले आन्दोलनको स्वरूप परिवर्तन गर्ने प्रतिबद्धता जनाएको छ । महासंघले सहमतिको न्यूनतम बिन्दु सरकारलाई बुझाइसकेको र त्यसअनुसार बुधबार बस्ने बैठकमा आन्दोलनको नयाँ मोडालिटीबारे निर्णय गरिने जनाएको छ ।

दुई सातासम्म रोकिएको संवाद फेरि सुरु भएको छ । वार्ता सकिएपछि शिक्षा, विज्ञान तथा प्रविधि मन्त्री रघुजी पन्तले संवाद सकारात्मक दिशामा अघि बढेको र चाँडै निष्कर्ष निकाल्ने प्रयास भइरहेको प्रतिक्रिया दिए ।

महासंघले चैत २० गतेदेखि आफ्ना विविध माग राख्दै आन्दोलन सुरु गरेको हो । २८ दिन लामो आन्दोलनका कारण सार्वजनिक शिक्षामा व्यापक असर परेको छ । माग सम्बोधनमा सरकारले देखाएको तत्परताको पृष्ठभूमिमा मंगलबारको वार्तालाई निर्णायक मानिएको छ ।

यसअघि निवर्तमान शिक्षामन्त्री विद्याभट्ट भट्टराईले शिक्षक आन्दोलनसम्बन्धी ७ बुँदे प्रस्ताव तयार पारेकी थिइन् । मंगलबारको वार्तामा उपप्रधानमन्त्री एवम् अर्थमन्त्री विष्णु पौडेल, गृहमन्त्री रमेश लेखक, र महासंघ अध्यक्ष लक्ष्मीकिशोर सुवेदी नेतृत्वको टोली सहभागी थिए ।