प्याब्सन रुपन्देहीले मङ्सिर १० गतेभित्र पालिका अधिवेशन सक्ने, डिजिटल रजिष्ट्रेशनमा जोडिन सदस्य विद्यालयलाई आग्रह

सेतोमसी
मंसिर ३, २०८१ सोमवार

प्याब्सन रुपन्देहीले मङ्सिर १० गतेभित्र पालिका अधिवेशन सक्ने, डिजिटल रजिष्ट्रेशनमा जोडिन सदस्य विद्यालयलाई आग्रह

अ +
अ
अ -

देवदह । निजी तथा आवासीय विद्यालय अर्गानाइजेशन नेपाल (प्याब्सन) रुपन्देहीले मङ्सिर १० गतेभित्र पालिकाहरुको अधिवेशन सक्ने निर्णय गरेको छ । आइताबार सम्पन्न प्याब्सन रुपन्देहीको जिल्ला बैठकले यस्तो निर्णय गरेको जनाइएको छ ।

प्याब्सन देवदह अध्यक्ष समेत रहेका जिल्ला सदस्य रामबहादुर गुरुङले मङ्सिर १० गतेभित्र अधिवेशन सम्पन्न गर्ने निर्णय जिल्ला समितिले गरेको जानकारी दिए । "संगठनको नीतिनियम अनुसार पालिकाहरुमा योग्य र सक्षम नेतृत्व निर्वाचित गर्ने र संगठनका सांगठनिक तथा आर्थिक प्रतिवेदन जिल्लामा बुझाउने निर्णय भएको छ ।" अध्यक्ष गुरुङले भने ।

प्याब्सनले हालसम्म संचालन गरेका विभिन्न कार्यक्रम, गतिविधि र ऐतिहासिक दस्तावेजलाई लिपिबद्ध गर्नको लागि बिगतका अधिवेशनहरुमा जस्तै स्मारिका प्रकाशन गर्ने निर्णय समेत गरेको छ । प्रकाशित हुन लागेको स्मारिका संयोजन र सम्पादनको लागि बैठकले उपसमिति गठन गरेको छ । जसको संयोजकमा बोधराज गौडेलको तथा सदस्यहरुमा राम बहादुर गुरुङ र महेश पराजुली रहेका छन् ।

त्यसैगरी केन्द्रिय प्याब्सनले आफ्ना सदस्य विद्यालयहरुको सबै गतिविधिहरुलाई समेट्ने गरी निर्माण गरिरहेको डिजिटल रजिष्ट्रेशनमा सम्पूर्ण विद्यालयहरुलाई यथासक्य चाँडो जोड्न र जोडिनु समेत बैठकले आग्रह गरेको जनाइएको छ ।

संगठनका अध्यक्ष अनन्तराम शर्माको अध्यक्षता, बरिष्ठ उपाध्यक्ष एक नारायण काफ्लेको स्वागत र सचिव दिपक खनालको सञ्चानलनमा बैठक सम्पन्न भएको थियो ।