राजेश पराजुली, पोखरा । पर्यटकीय राजधानी पोखराको लेकसाइडमा पर्यटकमाथि ज्यादती र हैरानी हुने गरेको गुनासो आउन थालेको छ । साथै लेकसाइड भित्रिने राष्ट्रबैंकचोक, फिस्टेल गेट, बाराहीचोक, हल्लनचोकदेखि जरेबरसम्म मुख्य पर्यटकीय क्षेत्रभित्र मोटरसाइकलमा आएका केही अपरिचित व्यक्तिले पर्यटकमाथि दुव्र्यवहार गर्ने र अपशब्द बोल्ने जस्ता गतिविधि गरेको बताइएको छ ।

होटल संघ पोखरा नेपाल र होटल प्रतिनिधि समाज पोखराले संयुक्त विज्ञप्ति प्रकाशित गरी लेकसाइड वरपर विगत केही समययता पर्यटकमाथि ज्यादती, हैरानी हुन गएको भन्दै व्यापक जनगुनासो आएकोप्रति गम्भीर ध्यानाकर्षण भएको जनाएको छ ।

होटल संघका अध्यक्ष लक्ष्मण सुवेदी र समाजका अध्यक्ष माधव लम्सालद्वारा जारी विज्ञप्तिमा भनिएको छ, ‘विशेषगरि लेकसाइड भित्रिने राष्ट्रबैंकचोक, फिस्टेल गेट, बाराहीचोक, हल्लनचोकदेखि जरेबरसम्म मुख्य पर्यटकीय क्षेत्रभित्र मोटरसाइकलमा आएका केही अपरिचित व्यक्तिले पर्यटकमाथि दुव्र्यवहार गर्ने र अपशब्द बोल्ने जस्ता गतिविधि गरेको पाइएको छ ।’

‘साथै अस्वस्थ प्रतिस्पर्धा गर्ने मनसायले गल्लीगल्लीमा बसी, सस्तो दरभाउमा आगन्तुक तान्ने, मोलमोलाई गर्ने, अमर्यादित क्रियाकलापका साथै यौनजन्य गतिविधिमा समेत उक्साउने र बाध्य गराउने गरेको पनि पाइएको छ’, विज्ञप्तिमा भनिएको छ ।

‘यी र यस्ता गतिविधिले समग्र पर्यटन क्षेत्रलाई बद्नाम गराउने हाम्रो निष्कर्ष छ, अबका दिनमा यी र यस्ता गतिविधि रोक्न हामी जोडदार माग गर्दछौँ’, विज्ञप्तिमा उल्लेख छ ।
अबका दिनमा पनि यस्ता गतिविधि नरोकिए वा पर्यटकमाथि धरपटक र ज्यादती भइरहेमा हामी कानूनी प्रक्रियामा जान बाध्य हुने दुवै संस्थाले चेतावनी दिएको छ ।

साथै अबका दिन यस्ता गतिविधि कहीँ कतै भएको पाइएमा तत्कालै जिल्ला प्रशासन कार्यालय कास्की, वडा प्रहरी कार्यालय बैदाम र पर्यटक प्रहरी कार्यालय पोखरामा खबर गरिदिन विज्ञप्तिमार्फत आग्रह गरिएको छ ।

विज्ञप्तिमा थप भनिएको छ, ‘पर्यटकमाथि हुने यस्ता गतिविधिलाई नियन्त्रण गर्न जिल्ला प्रशासन कार्यालयका साथै सबै सरोकारवाला निकायको ध्यानाकर्षण गराउन चाहन्छौँ ।’