चाडपर्व लक्षित देवदह नगरको बजार अनुगमन

सेतोमसी
कार्तिक १२, २०८१ सोमवार

अ +
अ
अ -

देवदह । चाडपर्व नजिकिए संगै देवदह नगरपालिकाले बजार अनुगमनलाई तिव्रता दिएको छ । अनुगमन टोलीले देवदह–१ र २ का विभिन्न पसल, होटल र उद्योगहरुमा अनुगमन गरेको हो । चाडपर्वको समयमा बजारमा हुने मूल्य बृद्धि तथा अखाद्य वस्तु नियन्त्रण गर्ने गरी पालिकाले अनुगमनलाई तिव्रता दिएको समितिका संयोजक कृष्णप्रसाद अधिकारीले बताए ।

अनुगमनको क्रममा विभिन्न अखाद्य वस्तु, म्याद गुज्रेको सामग्री बरामद गरी नष्ट गरेको संयोजक अधिकारीले जानकारी दिए । सोहि क्रममा म्याद सकिएको भुजा, मासको पिठो, आटो, विग्रेको स्याउ, दाल, पाउरोट बनाउने सामग्री बरामद गरी नष्ट गरिएको अधिकृत गंगाप्रसाद पन्थीले जानकारी दिए ।

यसैगरी अनुगनको क्रममा मिठाई पसलबाट मिठाईमा प्रयोग गरिने अखाद्य वस्तु स्वणीम हाईड्रो सरफाई संगै केही मिठाईहरु पनि बरामद गरी नष्ट गरिएको पन्थिले बताए । टायलमा प्रयोग गरिने अखाद्य वस्तु मिठाईमा प्रयोग गरिएको पाईएकोले अवका दिनमा यस्ता सामग्री प्रयोग नगर्न सुझाईएको पन्थीले जानकारी दिए ।

अनुगमनका क्रममा व्यवसायीहरुले पसलमा मूल्य सूची नराखेको पाइएको संयोजक अधिकारीले जानकारी दिए । पसलहरु अनुगमनका क्रममा व्यवसायीहरुलाई सचेत पारिएको र अटेर गरेमा कानुनी कार्वाही गरिने अनुगमन समितिका संयोजक अधिकारीले जानकारी दिए ।