देवदहमा हरित उद्यम सम्बन्धी बन्द प्रशिक्षण हुँदै, नौ विद्यालयका विद्यार्थी सहभागी हुने

सेतोमसी
कार्तिक ११, २०८१ आइतवार

देवदहमा हरित उद्यम सम्बन्धी बन्द प्रशिक्षण हुँदै, नौ विद्यालयका विद्यार्थी सहभागी हुने

अ +
अ
अ -

देवदह । देवदहका विद्यार्थीहरूलाई हरित युवा उद्यमशीलता सम्बन्धी तीनदिने बन्द प्रशिक्षण गरिने भएको छ । सोमबार समृद्ध समुदाय विकास केन्द्रको आयोजनामा देवदहका नौ वटा माध्यमिक विद्यालयका कक्षा ११ मा अध्ययनरत विद्यार्थीलाई प्रशिक्षण दिन लागिएको हो ।

युवा शसक्तिकरण र शिक्षा क्षेत्रमा काम गरिरहेको समृद्ध समुदाय विकास केन्द्रले वातावरणलाई बचाउँदै हरित उद्यमशीलतामा युवालाई जोड्नको लागि प्रशिक्षण कार्यक्रम आयोजना गरिएको केन्द्रका अध्यक्ष ठाकुर घिमिरेले जानकारी दिए ।

‘विश्वमा बढिरहेको वातावरणिय प्रदुषण कम गर्न र युवाहरूलाई यसको महत्वबारे बोध गराउँदै देशमै केही गरौं भन्ने भावनाको विकास गराउन तीनदिने प्रशिक्षण आयोजना गरिएको हो ।’ अध्यक्ष ठाकुरले भने, ‘यसले सम्भावनाको खोजी गर्नेछ, सुनौलो सपना युवाहरूलाई देखाउने छ र आजको युवालाई भोलिको संसारबारे परिचित बनाउने छ ।’

कार्यक्रमको सहजीकरण गो जेब्रा डेनमार्ककी निर्देशक लि मेथै जेन्सनले गर्नेछन् । साथै नवप्रवद्र्धनमा जोडिएका हरित युवा उद्यमीहरूसंग समेत प्यानल डिस्कसनसंगै अनुभव आदानप्रदानसमेत हुने आयोजकले जनाएको छ ।

तीन दिनसम्म संचालन हुने प्रशिक्षणमा २७ जना विद्यार्थीसहित ४० जनाको सहभागीता रहने केन्द्रका निर्देशक युवराज चापागाईंले जानकारी दिए ।

देवदह नगरपालिकासँगको संयोजनमा सञ्चालन हुने कार्यक्रमका लागि स्कुल लाइफ नेपाल, डेनमार्कले आर्थिक सहयोग गरेको छ ।