देवदह । नेपाली कांग्रेसले रूपन्देहीको देवदहमा अन्तरविद्यालय स्तरीय वक्तृत्वकला प्रतियोगिता गर्ने भएको छ । पार्टीको प्रतिनिधिसभा क्षेत्रीय कार्यसमिति  क्षेत्र नं १ रुपन्देहीको आयोजनामा भदौ २८ गते शुक्रबार अन्तरविद्यालय स्तरीय वक्तृत्वकला प्रतियोगिता गर्ने भएको हो । 

पार्टीका क्षेत्रीय सभापति हिरा बहादुर खत्रीले नेपाली काङ्ग्रेसका संस्थापक नेता तथा प्रथम जननिर्वाचित प्रधानमन्त्री विपी कोइराला जन्म जयन्तीको अवसरमा 'बहुआयामिक शिखर व्यक्तित्व विश्वेश्वरप्रसाद कोइराला' शिर्षकमा वक्तृत्वकला प्रतियोगिता आयोजना गरिएको बताए । 

"प्रजातान्त्रिक समाजवादी आन्दोलनका नेता जननायक बीपी कोइरालाको जन्म दिनलाई स्मरण गर्दै नेपाली कांग्रेसले देशैभरि सप्ताहव्यापी कार्यक्रमहरु गरी  गर्दै आएको सन्दर्भमा नेपाली कांग्रेस, क्षेत्रीय समिति, क्षेत्र नं. १ रुपन्देहीले यस क्षेत्रभित्र रहेका विद्यालयहरू बीच आत्मीय सम्बन्ध स्थापित गर्न एवम् विद्यार्थीहरुको ज्ञान अभिवृद्धिका लागि वक्तृत्वकला प्रतियोगिता आयोजना गरेको छ ।" सभापति खत्रीले भने, " १११ औं बी.पी. जन्मजयन्ती मनाइरहँदा बहुआयामिक व्यक्तित्व विपी कोइरालाको बारेमा विद्यालयमा अध्ययनरत विद्यार्थीले कसरी बुझेका छन् भन्ने जान्न पनि यो कार्यक्रम महत्वपुर्ण हुनेछ भन्ने विश्वास लिइएको छ ।"

प्रतियोगितामा सहभागिताका लागि ६० वटा विद्यालयलाई पत्रचार गरिएको पार्टीले जनाएको छ । 

प्रतियोगितामा प्रथम, द्वितीय, तृतीय र सान्तवना हुनेलाई क्रमश: ११ हजार, ८ हजार, ५ हजार र दुई हजार पाँच सय नगदसहित प्रमाण-पत्र र सहभागी सम्पूर्ण विद्यार्थी र विद्यालयलाई सहभागीताको प्रमाण-पत्रको साथमा विपी कोइरालाको पुस्तक प्रदान गर्ने आयोजकले जनाएको छ । 

कार्यक्रममा विद्यार्थीको प्रस्तुति हेर्न र आफ्ना विचार प्रस्तुत गर्न पार्टीका महामन्त्री विश्वप्रकाश शर्मा सहभागी हुने जनाइएको छ । 

वि.स. १९७१ भाद्र २४ गतेका दिन जन्मिएका विपी कोइरालाको जन्मजयन्ति र स्मृति दिवसको अवसरमा नेपाली कांग्रेसले विभिन्न कार्यक्रम गर्दै आएको छ ।  देवदहमा गतसाल आयोजना गरिएको प्रतियोगितामा ३५ वटा विद्यालयले सहभागिता जनाएका थिए ।