देवदहमा राँके जुलुस

सेतोमसी
भाद्र २६, २०८१ बुधवार

अ +
अ
अ -

देवदह । देवदहमा क्रियाशील जनपक्षीय संयन्त्र देवदहले राँके जुलुस निकालेको छ । व्यवसायीसंग नेपाल विद्युत प्राधिकरणले उठाउनुपर्ने २२ अर्ब रकम असुल गर्नुपर्ने तथा देवदहमा देखिएका भ्रष्टाचार र अनियमितताको बिरुद्धमा बुधबार साँझ राँके जुलुस निकालिएको संयन्त्रका सचिव दिपक न्यौपानेले जानकारी दिए ।

देवदहको मिलनचोकबाट सुरु भएको जुलुस खैरेनी चोकमा पुगेर कोणसभामा परिणत भएको थियो ।

कोणसभामा बोल्दै संयन्त्रका अध्यक्ष टंक पोखरेलले व्यापारीसँग उठाउनुपर्ने २२ अर्ब रकम नउठाउन प्रधानमन्त्री केपी शर्मा ओलीले निर्देशन दिने तर जनताको घरमा बिजुलीको कनेंक्सन काट्ने र जरिवाना लगाउने जस्ता जनविरोधी कार्य भएको उल्लेख गरे । वक्यौता नउठाउँदासम्म सर्वसाधारणको घरमा मिटर रिडिङ्ग नगर्न र कुनैपनि जरिवाना नलगाउन उनले आग्रह गरे । त्यसो गरिए आफूहरू कडा आन्दोलनमा उत्रिन बाध्य हुने उनको भनाइ छ ।

कोणसभामा संयन्त्रका चिरन्जीवी काफ्ले लगायतले देवदह नगरपालिकामा समेत बेथिति मौलाएको उल्लेख गर्दै विरोध जनाएका थिए ।

राँके जुलुसमा सहभागीलाई रोक्न प्रयत्न गर्दै प्रहरीले राँको खोस्ने प्रयास गरेको थियो ।

आयोजकले आन्दोलनमा प्रहरी हस्तक्षेप भएको भन्दै आपत्ति जनाएका छन् । सेतोमसीसंग कुरा गर्दै संयन्त्रका सचिव न्यौपानेले प्रहरी प्रशासन आन्दोलनलाई विथोल्न र झडप निम्त्याउन उद्दत देखिएपनि आफूहरू संयमित भएर शान्तिपूर्ण ढंगले विरोध जनाएको बताए ।

२२ अर्ब असुल गर्नुपर्ने लगायतका माग गर्दै यसअघि संयन्त्रले विद्युत प्राधिकरण र जिल्ला प्रशासन कार्यालय मार्फत ज्ञापन पत्र बुझाएको थियो ।